संग्रहण केंद्र म बने पक्का चबूतरा ले बांचत हे नमी, बारिश अऊ मुसुवा ले धान

कोरिया, 22 जनवरी 2021। मनरेगा के अभिसरण ले धान संग्रहण केंद्र मन म बनाय गए पक्का चबूतरा ये साल धान ल नमी, बारिश अऊ मुसुवा मन ले बचावत हे। कोरिया जिला के दूरस्थ विकासखण्ड भरतपुर के गाँव कंजिया म घलोक मनरेगा अऊ 14वां वित्त आयोग के राशि के अभिसरण ले संग्रहण केंद्र म पक्का चबूतरा बनाय गए हे। ए चबूतरा मन ह सरकार के समर्थन मूल्य म उपार्जित धान के सुरक्षा ल लेके ग्राम पंचायत अऊ सहकारी समिति के प्रबंधक मन के माथा ले चिंता के लकीर मन ल खतम कर देहे हे। उहें दुसर कोति अपन धान बेच आए किसान मन घलोक अब पूरा निश्चिंत हे के स्थानीय सहकारी समिति म रखाए उंखर धान बेमौसम होवइया बारिश, नमी अऊ चूहा अऊ कीड़ा मन के प्रकोप ले सुरक्षित हे।
मनरेगा (महात्मा गांधी राष्ट्रीय ग्रामीण रोजगार गारंटी अधिनियम) के अभिसरण अऊ ग्राम पंचायत अऊ सहकारी समिति के संघरा उदीम ले ये संभव हो सके हे। मनरेगा ले पास होए सात लाख 38 हजार रूपिया अऊ 14वां वित्त आयोग के 50 हजार रूपिया के अभिसरण ले कंजिया धान संग्रहण केंद्र म चार पक्का चबूतरा के बनवाए गए रहिस। स्थानीय पंचायत अऊ समिति ल एखर से जिहां धान ल सुरक्षित रखे म सहजता होवत हे, उहें किसान घलोक अब खुश हे। वनांचल भरतपुर के ग्राम पंचायत कंजिया के सरपंच श्रीमती विपुलता सिंह कहिथे कि संग्रहण केन्द्र म चबूतरा के निर्माण ले धान ल सुरक्षित रखे म बड़का मदद मिलत हे। इंकर बने के कुछेक महीना मन म उपार्जित धान के सुरक्षित रखरखाव ले पक्का चबूतरा के उपयोगिता अऊ सार्थकता दिखे लगे हे। कंजिया म 18 जनवरी 2021 तक किसान मन ले उपार्जित 15 हजार 106 क्विंटल धान आ चुके हे, जऊन ल ए चबूतरा मन के ऊपर सुरक्षित रखे गए हे।