रायपुर, छत्तीसगढ़ म स्वास्थ्य सुविधा के विस्तार करत राज्य म श्री धनवंतरी दवा योजना शुरु करे जात हे। ये योजना के तहत 169 शहर मन म 188 अइसे मेडिकल स्टोर खोले जाही, जेमा मरीज मन ल एमआरपी म 50 प्रतिशत ले जादा के छूट देहे जाही। मुख्यमंत्री श्री भूपेश बघेल 20 अकटूबर के ये योजना के शुभारंभ करहीं। योजना के शुरुआत 85 श्री धन्वंतरी जेनेरिक मेडिकल स्टोर्स के संग करे जाही। ये सबो दुकान ये महिना के आखरी तक सुरू हो जाही। आगू ए दुकान मन ह घर पहुंचा के दवा घलोक देही।
मुख्यमंत्री श्री भूपेश बघेल ह कहिन के हमर सरकार ह गरीब अऊ वंचित वर्ग तक शासन के योजना मन के लाभ पहुंचाए बर बहुत अकन प्रभावी कदम उठाए हे। इही दिशा म एक अऊ पहल करत श्री धन्वंतरी जेनेरिक मेडिकल स्टोर्स शुरू करे जात हे। अब सस्ता दवा सबो के पहुंच म होही। ये योजना के लाभ जादा ले जादा मनखे मन तक पहुंचाए के उदीम करे जाही। एखर से दवाइ मन म होवइया खरचा के बोझा कम हो सकही। ये योजना के माध्यम ले हम सब्बो स्वस्थ जम्मो सुग्घर के परिकल्पना ल साकार करे म सफल होबो। नगरीय प्रशासन मंत्री डॉ. शिवकुमार डहरिया ह कहिन कि सेवा जतन सरोकार–छत्तीसगढ़ सरकार हमर सरकार के आदर्श वाक्य हे। योजना के माध्यम ले शासन कोति ले एला चरितार्थ करे जात हे।
जानबा हे कि छत्तीसगढ़ म स्वास्थ्य सुविधा मन के विस्तार राज्य सरकार के सर्वोच्च प्राथमिकता रहे हे। ये दिशा म ग्रामीण क्षेत्र मन के संगें-संग शहरी क्षेत्र मन म कई पहल करे गए हे। शहरी क्षेत्र मन म मुख्यमंत्री स्लम स्वास्थ्य योजना, सिटी डायग्नोस्टिक सेंटर, दाई दीदी क्लीनिक आदि के माध्यम ले जमीनी स्तर तक सुविधा मन के विस्तार करे गए हे। एही कड़ी म अब आम नागरिक मन ल उच्च गुणवत्ता के रियायती दवा उपलब्ध कराए बर श्री धनवंतरी योजना प्रारम्भ करे जात हे। योजना अंतर्गत राज्य के सबो 169 नगरीय निकाय मन म शासन के सहयोग ले श्री धन्वंतरी जेनेरिक मेडिकल स्टोर खोले जात हे। नगरीय निकाय मन कोति ले 188 दुकान मन के चिन्हांकन करे गए हे। ए दुकान मन म 251 दवाइ, 27 सर्जिकल आइटम साहित कई ठन सामान उपलब्ध रइही। लघु वनोपज संघ कोति ले बने गुणवत्तापूर्ण हर्बल उत्पाद घलोक ए दुकान मन म उपलब्ध रइही। ए दुकान मन म देश के ख्यातिप्राप्त कंपनी मन के जेनरिक दवइ मन के बिक्री करे जाही। सर्दी, ख़ासी, बुखार, ब्लड प्रेशर जैसी आम बीमारी के संगें-संग गंभीर बीमारी मन के दवइ, एंटीबायोटिक, सर्जिकल आइटम घलोक उपलब्ध रइही।
ये सबो समान एमआरपी म 50 प्रतिशत ले जादा छूट के संग मिलही। नागरीय निकाय मन ह जादा-ले जादा छूट देवईया बेपारी मन बर निविदा के आमंत्रण करे रहिस, जेमे सबो निकाय मन म 50 % ले जादा छूट के दर प्राप्त होए हे। श्री धन्वंतरी जेनेरिक मेडिकल स्टोर संचालक मन ल 2 रुपिया प्रति वर्गफुट के आकर्षक दर ले नगर पालिक निगम कोति ले किराया म दुकान उपलब्ध कराए जात हे। संगेच ए मेडिकल स्टोर्स ले आन योजना मन म घलोक दवइ खरीदे के आश्वासन घलोक देहे गए हे । योजना के सफल संचालन के जिम्मेदारी जिला कलेक्टर के अध्यक्षता म गठित यूपीएसएस ल देहे गए हे।
आधा कीमत म मिलही दवई: छत्तीसगढ़ के 169 शहर म खुलही 188 मेडिकल स्टोर
