भेंट-मुलाकात कार्यक्रम म मुख्यमंत्री श्री भूपेश बघेल ह स्वेच्छानुदान ले दू लाख देहे के करिन घोषणा
धरमजयगढ़, मुस्कान ल घलोक का मालूम रहिस कि एक दिन प्रदेश के मुख्यमंत्री वोखर घर के तीर आही अऊ ओखर जेन सपना हे ओला पूरा कर देंहीं? बीएससी गणित के पढ़ई पूरा करे के बाद रिसर्च करे के सपना संजोए मुस्कान अपन इरादा घर म ए पाए के घलोक वता नइ पात रहिस कि पढ़े अऊ बाहिर जाय बर लाखों रूपिया कहां ले आही? काबर के एक छोटकुन किराना दुकान ले घर के खर्च चलथे, फेर छोटे भाई-बहिनी घलोक तो हे। अपन सउंख ल दबाए मुस्कान खुद घर वाले मन के मदद बर ट्यूशन पढ़ात रहिस। आज जब मुस्कान ह सुनिस कि घर तीर मुख्यमंत्री अवइया हे अऊ ओ मन मनखे मन ले मिलथें घलोक, त ये सोचके उंहा आ गे कि पता नहीं मिल पाहूं या नहीं, उम्मीद पूरा होही या नहीं! इहां जब मुख्यमंत्री श्री भूपेश बघेल ह मुस्कान के व्यथा अऊ इच्छा जानीन,सुनीन त मिनटों म उंखर मिन्नत मन ल पूरा कर दीन।
धरमजयगढ़ के भुइंया म भेंट-मुलाकात कार्यक्रम म आए प्रदेश के मुख्यमंत्री श्री बघेल ल छात्रा मुस्कान अग्रवाल ह जब अपन व्यथा बताईस कि वो गरीब परिवार ले हे अऊ बीएससी के पढ़ाई पूरा कर डरे हे, अब आगू रिसर्च के फील्ड म जाना चाहथे। बैंगलोर म जाके पढ़ाई करना चाहथे। एखर बर कोचिंग करना जरूरी हे, फेर वो सक्षम नइ हे। मुख्यमंत्री श्री बघेल ह छात्रा के बात ल ध्यान से सुनिन अऊ कहिन बता कतका चाही? छात्रा मुस्कान ह स्टीमेट नइ बनाए के बात बताईस त मुख्यमंत्री ह मजाकिया लहजा म कहिन कि तैं एक मुख्यमंत्री ले बिना स्टीमेट के बात करबे त मैं कइसे तोला रकम दे पाहूं। चिटिकन कलेचुप होए मुस्कान के मुस्कुराहट ल देखके मुख्यमंत्री ह ओ ल आवेदन देहे के बात कहत तुरंतेच स्वेच्छानुदान ले दू लाख रूपिया देहे के घोषणा कर दीन। मुख्यमंत्री के ये घोषणा म उहाँ उपस्थित महिला मन संग मनखे मन ह ताली बजाके मुख्यमंत्री ल धन्यवाद दीन।
धरमजयगढ़ के मुस्कान अग्रवाल ह बताइस कि वो घर म पइसा के कमी ल देखत कोनो ल अपन इच्छा बता नइ पात रहिस। आज थेरकेच बेरा म मुख्यमंत्री ले मुलाकात अऊ मांग पूरा होए म छात्रा मुस्कान ह एखर बर मुख्यमंत्री के आभार जतात धन्यवाद घलोक ज्ञापित करिस।
