धरती आबा अभियान ले बदलही कोरिया के हाल

154 आदिवासी गांव मन होही विकास के मुख्यधारा म सामिल
कोरिया, भारत सरकार के जनजातीय कार्य मंत्रालय कोति ले कोरिया जिला ल ‘धरती आबा जनजातीय ग्राम उत्कर्ष अभियान‘ के अंतर्गत जिला के 154 आदिवासी बहुल गांव मन के चयन करे गए हे, जेला पूरा विकास के मुख्यधारा म लाय के लक्ष्य रखे गए हे।
ये अभियान कलेक्टर श्रीमती चन्दन त्रिपाठी के मार्गदर्शन म संचालित होही, जेखर तहत ग्राम स्तर म जागरूकता शिविर, सरकारी सेवा मन के उपलब्धता अऊ आधारभूत सुविधा मन के विस्तार ल प्राथमिकता दे जाही। सहायक आयुक्त, आदिवासी विकास ह बताइस कि ए पहल के उद्देश्य बुनियादी ढांचा, शिक्षा, स्वास्थ्य, आजीविका अऊ सामाजिक सुरक्षा जइसे महत्वपूर्ण क्षेत्र मन म अंतराल के पहिचान करके अभिसरण अऊ संतृप्तिकरण के माध्यम ले विकास सुनिश्चित करना हे।
15 जून ले 30 जून तक चलही विशेष शिविर अभियान
अभियान के अंतर्गत जिला म 15 जून ले 30 जून 2025 तक ग्राम अऊ क्लस्टर स्तर म विशेष शिविर के आयोजन करे जाही, जेमें कागद संबंधी सेवा, आधार कार्ड, राशन कार्ड, आयुष्मान कार्ड, जाति प्रमाण पत्र बनाए जाही। आजीविका अउ कृषि ले सम्बंधित किसान क्रेडिट कार्ड, पीएम किसान सम्मान निधि, मुद्रा ऋण, पीएम विश्वकर्मा, सामाजिक सुरक्षा योजना के तहत वृद्धावस्था, विधवा, दिव्यांग पेंशन, बीमा कवरेज, जन-धन खाता के लाभ दे जाही। महिला अउ बाल कल्याण कोति ले टीकाकरण, पीएम मातृत्व वंदना योजना, आईसीडीएस सेवा, बुनियादी सुविधा के तहत सड़क, बिजली, पानी, मोबाइल मेडिकल यूनिट्स, पक्का मकान अऊ शिक्षा अऊ कौशल विकास के तहत आवासीय विद्यालय, छात्रावास, कौशल प्रशिक्षण अऊ रोजगार के अवसर आदि लाभ ए आदिवासी गांव वाले मन ल मुहैया कराए जाही।
कलेक्टर श्रीमती चन्दन त्रिपाठी ह बताइस के भारत सरकार के जनजातीय काम मंत्रालय के निर्देश म ये वाले काम करे जात हे। ‘धरती आबा अभियान‘ जिला बर एक सुखद परिवर्तनकारी पहल साबित हो सकत हे, जेन आदिवासी गांव मन ल आत्मनिर्भर अऊ समृद्ध बनाए के दिशा म एक बड़का कदम हे। जिला प्रशासन ह जनजातीय समुदाय ले विशेष अनुरोध करे हे के ओ मन ए शिविर म भाग लेवंय अऊ योजना मन के लाभ उठाके अपन गांव अऊ जीवन ल सशक्त बनावंय।