सारंगढ़ बिलाईगढ़, 24 मई 2024। कलेक्टर अउ जिला निर्वाचन अधिकारी धर्मेश कुमार साहू ह कहिन कि अवइया 4 जून के लोकसभा निर्वाचन के मतगणना होवइया हे। एखर बर जरूरी प्रशिक्षण, टेबल रनर, माइक्रो आब्जर्वर, गणना करइया अधिकारी-कर्मचारी मन के व्यवस्था, ड्यूटी, परिचय पत्र जारी करे, पत्रकार मन के मीडिया पास आदि के संबंध म अधिकारी मन ल हुकुम देहे गीस। एखर संगेच एसडीओपी अविनाश मिश्रा अऊ पीडब्ल्यूडी अधिकारी ल परिसर म पंडाल, बेरिकेटिंग, आगमन-बर्हिगमन, सुरक्षा के लेआउट तैयार करे बर कहिन। कलेक्टर ह सीएमओ श्री राजेश पांडेय ल मतगणना परिसर के सफाई करे बर निर्देश दीन।
श्री धर्मेश साहू ह स्कूल चालू के संबंध म जानकारी लीन। बीईओ नरेश चौहान ह बताइस कि 18 जून के आसपास स्कूल चालू करे जाही। एखर पहीनी स्कूल म मरम्मत काम ल पूरा करे जाही। कलेक्टर ह जिला के गुरूजी मन ल स्पष्ट कहिन कि ओ मन अपन स्कूल म सरलग पढ़ावव, नइ पढ़ाए के कोनो बहाना नइ चलय। कहूं कोनो स्कूल म दू शिक्षक पदस्थ हे अऊ वो खुद ड्यूटी निरधारित करके एक दिन अनुपस्थित रहत हें त ऊंखर अनुपस्थिति उपर मैं कार्यवाही करहूं।