धरसींवा के सामुदायिक स्वास्थ्य केन्द्र अउ शासकीय उच्चतर माध्यमिक शाला टेकारी के नवा नामकरण : मुख्यमंत्री दाउ भूपेश बघेल के घोषणा

रइपुर 12 अगस्त 2021 बिरस्पत। मुख्यमंत्री दाउ भूपेश बघेल अपन घरू कार्यालय ले खरोरा नगर पंचायत म शहीद योगेन्द्र शर्मा जयंती म होवइया कार्यक्रम म वर्चुअल रूप ले संघरके धरसींवा के सामुदायिक स्वास्थ्य केन्द्र अउ शासकीय उच्चतर माध्यमिक शाला टेकारी के नामकरण शहीद योगेन्द्र शर्मा के नाम म करे के घोषणा करीस। उन कहीन कि शहीद योगेन्द्र शर्मा के प्रेरणादायी व्यक्तित्व अउ सेवा-भावना ल कभी भूलाए नई जा सकय।
मुख्यमंत्री ह ये मउका म शहीद योगेन्द्र शर्मा के सुरता म ‘‘नमन अंचल के शहीदों को‘‘ पुस्तक के विमोचन करीन। खरोरा नगर पंचायत म जयंती कार्यक्रम के बेरा म होवइया फोकट म स्वास्थ्य शिविर अउ रक्त दान शिविर बर मुख्यमंत्री ह शुभकामना दीन। ये बेरा म मुख्यमंत्री घर शहीद योगेन्द्र शर्मा के धर्मपत्नी अउ विधायक धरसींवा श्रीमती अनिता योगेन्द्र शर्मा, सुपुत्र श्री हर्षित शर्मा संग श्री विपिन त्रिपाठी, श्री भोला तिवारी तको संघरीन। कार्यक्रम जगा खरोरा नगर पंचायत म छत्तीसगढ़ खनिज विकास निगम के अध्यक्ष श्री गिरीश देवांगन, श्री प्रमोद शर्मा, श्री मण्डल दास गिलहरे, श्री सुभाष मिश्र संग नगर पंचायत खरोरा के पार्षद, एल्डरमेन संग अबड़ झिन गणमान्य नागरिक संघरीन।
मुख्यमंत्री ह कहीन कि शहीद योगेन्द्र शर्मा के जन्म 12 अगस्त 1962 के धरसींवा विकासखंड के ग्राम-पंचायत टेकारी म होइस। वोमन 1985-86 म विश्वविद्यालय प्रतिनिधि निर्वाचित होइस। धरसींवा क्षेत्र म मजदूर अउ उद्योगपति मन के बीच एक सेतु बनके दूनो के सरीदिन सहयोग करीन। आगू चलके बछर 1995 ले 2000 तक निर्विरोध जनपद सदस्य रिहिन। सन् 2000 ले 2005 तक जिला पंचायत सदस्य रिहिन।
मुख्यमंत्री कहीन कि 25 मई 2013 के झीरम घाटी हमला मन हमन अपन अबड़ झिन बड़का नेता अउ जुझारू कार्यकर्ता मन ल खो देन जेमा योगेंद्र शर्मा तको रिहिन। कार्यक्रम ल छत्तीसगढ़ खनिज विकास निगम के अध्यक्ष श्री गिरीश देवांगन तको सम्बोधित करीन।