दुर्ग, भिलाई शहर के वृन्दानगर, जे.पी.नगर, शारदापारा अऊ न्यू संतोषीपारा केम्प क्षेत्र के आसपास डायरिया फैले हे। अभी हाल के स्थिति ल देखत खुद मुख्य चिकित्सा अऊ स्वास्थ्य अधिकारी डॉ. जे.पी. मेश्राम अऊ श्री चंदूलाल चंद्राकर मेडिकल कॉलेज, जिला दुर्ग के संघरा गठित टीम ह क्षेत्र के दउरा करके यू.पी.एच.सी. बैकुंठधाम म पदस्थ चिकित्सा अधिकारी मन अऊ जम्मो कर्मचारी मन ल जरूरी मार्गदर्शन दीन।
आज जिला चिकित्सालय दुर्ग ले स्टूल सैम्पल सकेल के भारतीय आयुर्विज्ञान संस्थान, रायपुर ल जॉंच बर भेजे गीस। संक्रमित क्षेत्र के निगरानी बर शहरी कार्यक्रम प्रबंधक, भिलाई, खंड विस्तार प्रशिक्षण अधिकारी, सेक्टर पर्यवेक्षक, ए.एन.एम. अऊ मितानिन मन 2406 घर के सघन सर्वे करिन। क्षेत्र म उल्टी-दस्त ले पीड़ित मरीज मन ल 495 ओ.आर.एस., 154 जिंक टेबलेट अऊ 1500 क्लोरिन टेबलेट बांटे गीस अऊ स्वास्थ्य शिक्षा देहे गीस। संक्रमित क्षेत्र म मुख्यमंत्री शहरी स्लम स्वास्थ्य योजना के एम्बुलेंस नियमित रूप ले भ्रमण करत मरीज मन ल दवई अऊ उचित स्वास्थ्य शिक्षा देत स्वास्थ्य संस्था मन तक भेजे बर प्रेरित करे के काम करत हें। संक्रमित क्षेत्र म भरपूर दवई मन के भंडारण करे गए हे अऊ गंभीर मरीज मन ल हायर सेन्टर रिफर करे बर एम्बुलेंस के व्यवस्था करे गए हे। आज जिला म 10 शासकीय अऊ 05 निजी स्वास्थ्य संस्था मन म कुल 15 डायरिया के प्रकरण मिले हे। अभी हाल म स्थिति नियंत्रण म हे।
दुर्ग : 17 डायरिया मरीज मन के जांच चलत हे, चिकित्सा विभाग संक्रमण ल लेके सजग
