बिहान ले गनेशी बाई बढ़त हे आत्मनिर्भरता के रद्दा म

पशुपालन करके बनिस लखपति दीदी, 3 लाख ले जादा कमावत हे सलाना
कोण्डागांव, जिला के जनपद पंचायत बड़ेराजपुर के बस्तरबुड़ा गांव के रहवइया श्रीमती गनेशी मरकाम ह राष्ट्रीय ग्रामीण आजीविका मिशन (बिहान) ले जुड़के पशुपालन के क्षेत्र म उल्लेखनीय उपलब्धि हासिल करे हे। गनेशी मरकाम आज “लखपति दीदी” के रूप म अपन नवा पहिचान बनाए हे।
गनेशी मरकाम गायत्री महिला स्व-सहायता समूह के सक्रिय सदस्य हे। समूह के माध्यम ले वो ह मक्का के खेती, बकरी पालन अऊ सूकर पालन ल आजीविका के माध्यम बना के अपन आर्थिक अऊ सामाजिक जीवन म बड़का बदलाव लाए हे। ए गतिविधि मनले ओ ल लगभग 3.56 लाख रूपिया तक के वार्षिक आय होवत हे।
वो ह बताइस के समूह म जुड़े के पहिली ओ अपन परिवार के संग खेती-किसानी, मजदूरी अऊ सीमित बकरी पालन करके अपन अऊ अपन परिवार के भरण-पोषण करत रहीस, अऊ ओ समय परिवार के वार्षिक आय मात्र 66 हजार रूपिया रहिस। बिहान ले जुड़े के बाद समूह के संग 15 हजार रूपिया आरएफ राशि, 60 हजार रूपिया सीआईएफ राशि अऊ करजा के रूप म सहयोग प्राप्त होइस। गनेशी ह बकरी पालन के व्यवसाय दू बकरी (छेरी) ले शुरुआत करे रहिस अऊ आज दो सौ ले जादा बकरी वोखर बाड़ा म हे संगेच सूकर (सूंरा) पालन (संख्या 10) घलोक शुरू करे हे। मेहनत अऊ नियमित देखभाल ले वोखर आय सरलग बाढ़त गीस अऊ अभी हाल म ओ ह करीब तीन लाख रूपिया वार्षिक आय अर्जित करत हे। ए गतिविधि मन ले न केवल ओ ह आत्मनिर्भर बने हे, बल्कि पहिली आय के तुलना म चार गुना जादा आय प्राप्त करत हे। अऊ बकरी मन के देखभाल करे खातिर एक मनखे ल रोजगार घलोक देवत हे। आज गनेशी के परिवार के आर्थिक स्थिति सुदृढ़ होए के संग सामाजिक जीवन म उल्लेखनीय सुधार होय हे।