राजनांदगांव, 30 सितमबर 2024। अन्नू साहू के पति बीमार रहिस अऊ काम नइ कर पात रहिस, उहें अन्नू के घरेलू कामगार के रूप म होवइया आय वोखर परिवार के भरण-पोषण करे बर कम रहिस। जब वोखर घर म निराशा के माहौल छाए रहिस, तब अन्नू ह ये तय करिस के ओ ल कोनो आन काम करे ल परही। अब अन्नू छत्तीसगढ़ के राजनांदगांव के गली मन म अपन ई-रिक्शा चलात हे, मनखे ओ ल ध्यान से देखथे। हल्का ठंड हवा अऊ सड़क के अवाज के बीच अन्नू आत्मविश्वास ले आगू बढ़त हे अऊ पीछू मुड़के नइ देखत हे।
अन्नू ह बारहवीं कक्षा तक के पढ़ाई पूरा करे के बाद घरेलू कामगार के रूप म काम करना शुरू कर दे रहिस। फेर वो काम म बहुतेच कम आय होत रहिस। अन्नू के जीवन म एक बड़ा मोड़ तब आइस जब वो ह श्रम विभाग के दीदी ई-रिक्शा सहायता योजना के बारे म सुनिस। ये योजना महिला मन ल ई-रिक्शा खरीदे बर वित्तीय सहायता प्रदान करके ओ मन ल आर्थिक स्वावलंबन के अवसर देथे। अन्नू ह ए अवसर ल दुनों हाथ ले थाम लीस। ज़िला श्रम अधिकारी के मदद ले अन्नू ह जल्दी आवेदन प्रक्रिया पूरा करिस, जरूरी दस्तावेज़ जमा करीस अऊ अपन आवेदन प्रस्तुत कर दीस। जब ओखर आवेदन स्वीकृत होइस, त अन्नू ह पहली पइत सफलता अऊ आर्थिक स्वतंत्रता के सुवाद चिखिस।
ई-रिक्शा ड्राइवर के रूप म काम करके अन्नू ह अपन परिवार के भविष्य ल सुरक्षित करे बर एक साहसिक कदम उठाइस। जल्दीच वोखर आय नियमित हो गे, अऊ अब वो हर महीना 20 ले 25 हजार रुपिया कमावत हे।