ई रिक्शा के हेंडिल थाम के जीवन के रद्दा होइस अब आसान
कोंडागांव, नहरपारा के रहइया आदिलक्ष्मी यादव के जीवन कभू कठिनाइ ले घिरे रहिस। परिवार के जिम्मेदारी निभाए बर ओ दूसर मन के घर मन म भोजन बनाके कइसनहेच अपन गुजारा करत रहिस। फेर लक्ष्मी के मन म हमेशा अपन पांव म खड़े होके परिवार ल बेहतर भविष्य देहे के सपना रहिस।
अपन आत्मनिर्भर बने के सपना ल साकार करे बर वो ह सरकार के ‘दीदी ई-रिक्शा योजना’ के बारे म जानकारी लीस। श्रम विभाग के अधिकारी मन ह जब ओ ल ए योजना अऊ शासन कोति ले देहे जात आर्थिक सहायता के बारे म विस्तार ले बताइस, त लक्ष्मी के जीवन के दिशा बदल गे। सरकार के ए योजना के लाभ उठात वो ह ई-रिक्शा बिसाइस अऊ छत्तीसगढ़ भवन अऊ आन संनिर्माण कर्मकार कल्याण मंडल म पंजीयन होए के सेती ओ ल एक लाख रुपिया के सहायता राशि घलोक मिलीस। आज लक्ष्मी अपन ई-रिक्शा चलाके हर महीना 15 ले 20 हजार रुपिया तक के कमई करत हे। ए आय ले ओ ह अपन ई रिक्शा के ईएमआई किस्त समय म जमा करत हे, संगेच बांचे पइसा ले अपन परिवार के भरण-पोषण घलोक बने सहिन करत हे। वो ह बताइस के ई रिक्शा चलाके अपन मेहनत ले पइसा कमाके ओ ल बहुत खुशी मिलथे। खुद के मेहनत अऊ लगन ले आगू बढ़े के हिम्मत रखइया महिला मन बर ये बहुत सुग्घर योजना हे।
लक्ष्मी भावुक होके बताथे के कभू जेन सड़क म ओ दूसर मन के घर काम करे बर पैदल जात रहिस, आज उही सड़क म अपन खुद के ई-रिक्शा के सवारी करवात हे।
सरकार के ये योजना लक्ष्मी जइसे महिला मन ल आत्मनिर्भर बनावत हे, संगेच समाज म महिला सशक्तिकरण के नवा मिसाल घलोक पेश करत हे। आज लक्ष्मी आत्मविश्वास के संग कहत हे के मेहनत अऊ सही अवसर मिले म महिला मन घलोक हर क्षेत्र म आगू बढ़ सकत हें। आदि लक्ष्मी ह शासन ले मिले सहायता बर मुख्यमंत्री श्री विष्णु देव साय के प्रति आभार व्यक्त करे हे।
दीदी ई रिक्शा योजना ले आदिलक्ष्मी ल मिलीस नवा रद्दा
