ई-रिक्शा के हेंडिल धरके चलावत हे अपन जीवन के गाड़ी

धमतरी, छ.ग. भवन अउ आन सन्निर्माण कर्मकार कल्याण मण्डल म पंजीकृत महिला निर्माणी श्रमिक श्रीमती सुषमा सतनामी पति श्री मनोज सतनामी, धमतरी जिला के ग्राम तेन्दूकोन्हा के रहइया आय। श्रीमती सुषमा ह मंडल म चलत ”दीदी ई-रिक्शा सहायता योजना” के तहत मदद बर अरजी दे रहिस। ए योजना के तहत ओला एक लाख रूपया के सहायता राशि, कर्मकार कल्याण मंडल योजना ले देहे गए हे।
योजना के लाभ मिले के बारे म हितग्राही श्रीमती सुषमा सतनामी ह बताइस के ओहा पहिली एक निर्माणी श्रमिक (रेजा) के रूप म काम करत रहिस अउ ओकर घरवाला घलो राजमिस्त्री के काम करथे। ओकर 2 ठन लइका हें, जेमन अभी 7वीं अउ 5वीं कक्षा म पढ़त हें। मजदूरी ले मिले पइसा ले ही ओहा अपन परिवार के पेट पालत रहिस। रोज के कमाय-खाय वाला मजदूर होय के सेती लइका मन ल पढ़ाए-लिखाए बर ओकर करा कोनो जमा पूँजी नइ रहिस।
श्रम विभाग म पता करे म ओला मालुम होइस के छ.ग. सासन के श्रम विभाग कोती ले निर्माणी महिला श्रमिक मन के भलाई अउ स्वरोजगार बर ”दीदी ई-रिक्शा सहायता योजना” चलाए जावत हे। ए योजना के लाभ अइसन पंजीकृत महिला निर्माणी श्रमिक मन ल मिलथे जेकर पंजीयन मंडल म कम से कम 03 बछर जुन्ना हो अउ ओकर उमर 18 ले 50 बछर के बीच हो। कार्यालय श्रम पदाधिकारी कोती ले ए जानकारी सुषमा ल देहे गीस।
जानकारी मिले के बाद श्रीमती सुषमा ह जम्मो कागज-दस्तावेज ल धरके श्रम विभाग के पोर्टल म ऑनलाइन आवेदन करिस। एकर बाद श्रम विभाग ह ओकर कागजात मन के जांच करिस अउ जम्मो चीज सही पाए जाय म कर्मकार मंडल कोती ले ओकर खाता म सीधा एक लाख रूपया भेज देहे गीस।
आज सुषमा ह धमतरी सहर म ई-रिक्शा चलाथे, जेकर ले ओला रोज के लगभग 500 ले 700 रूपया के आय हो जाथे। एकर ले ओहा अपन परिवार के भरण-पोषण अउ लइका मन के परवरिश बढ़िया तरीका ले करत हे। श्रीमती सुषमा ह मुख्यमंत्री अउ श्रम मंत्री ल ए योजना के लाभ दे बर हिरदे ले आभार जताइस अउ धन्यवाद दिस।