“दीदी के गोठ” के एक बछर पूरा होए के सफल रस्ता पूरा — वार्षिकोत्सव समारोह 09 जुलाई 2026 के
रायपुर, पंचायत अउ ग्रामीण विकास विभाग कोति ले छत्तीसगढ़ राज्य ग्रामीण आजीविका मिशन – बिहान के अंतर्गत चलइया “दीदी के गोठ” कार्यक्रम ह अपन एक बछर के सफल, प्रेरणा देवइया अउ मनखे मन के भागीदारी ले भरे रस्ता ला पूरा कर लेहे हे। ए उपलब्धि के खुसी मं “दीदी के गोठ वार्षिकोत्सव–2026” अउ संकुल स्तरीय संगठन सम्मेलन के बड़का आयोजन 09 जुलाई 2026 के पंडित दीनदयाल उपाध्याय ऑडिटोरियम, रायपुर मं करे जात हे।
ए कार्यक्रम के मुख्य उद्देश्य गांव के माईलोगन मन के प्रेरणा देवइया कहानी, ओमन के मिहनत, अगुवाई करे के छमता अउ आजीविका मं मिले सफलता ला एक मंच देना अउ ओमन के सम्मान करना हे। “दीदी के गोठ” ह बीते एक बछर मं महिला स्व-सहायता समूह मन ला मजबूत करे, पइसा-कउड़ी के समझ बढ़ाए अउ समाजिक अउ आर्थिक रूप ले अपन गोड़ मं खड़ा करे मं बड़का भूमिका निभाए हे।
ए गरिमा भरे अवसर मं छत्तीसगढ़ के माननीय मुख्यमंत्री मुख्य अतिथि के रूप मं उपस्थित रहिहीं। कार्यक्रम के अध्यक्षता माननीय उपमुख्यमंत्री अउ पंचायत व ग्रामीण विकास मंत्री विजय शर्मा करहीं।
कार्यक्रम मं अलग-अलग जनप्रतिनिधि, विभाग के अधिकारी, स्व-सहायता समूह के माईलोगन अउ समाज के कतको वर्ग के मनखे मन सामिल होके ए सफल रस्ता के गवाह बनिहीं।
जानबा हे के “दीदी के गोठ” के पहिली एपिसोड के प्रसारण अगस्त 2025 मं होय रहीस, जे “लखपति दीदी” बिसय ऊपर रहिस। एकर बाद हर महीना के दूसर बिरसपत के अलग-अलग जिला के समूह के दीदी मन डाहर ले ड्रोन दीदी, एफपीसी, जेंडर, सरस मेला, पइसा-कउड़ी के जागरूकता, साइबर सुरक्षा अउ “छत्तीसकला” ब्रांड जइसे जरूरी बिसय मन ऊपर अपन सफलता के कहानी सुनाए गिस। “दीदी के गोठ” के एक बछर के सफल रस्ता के खास प्रसारण 09 जुलाई 2026 के करे जाही।
“दीदी के गोठ” ह गांव-गंवई मं माईलोगन के जिनगी मं नीक बदलाव लाए के काम करे हे। ए मंच ह सिरिफ गोठ-बात के माध्यम नो हे, भलुक महिला मन के आत्मा-बिस्वास, अगुवाई अउ आत्मनिरभरता के चीन्हा बनके आघू आए हे।
कार्यक्रम मं बछर भर के सफलता के जानकारी देहे जाही, “दीदी के गोठ” मं भाग लेवइया माईलोगन मन के सम्मान करे जाही अउ आघू के काम मन ऊपर घलो गोठ-बात करे जाही।
छत्तीसगढ़ राज्य ग्रामीण आजीविका मिशन- बिहान डहर ले जम्मो नागरिक, स्व सहायता समूह मन अउ इलेक्ट्रॉनिक अउ प्रिंट मीडिया ले अरजी करे गेहे के ए बड़का अवसर मं आके अपन उपस्थिति दर्ज करावंय अउ कार्यक्रम ला सफल बनावंय।