ग्रामीण महिला मन के सशक्तिकरण के दिशा म पंचायत अऊ ग्रामीण विकास विभाग के नवा पहल : ‘दीदी के गोठ’ रेडियो कार्यक्रम के होही शुभारंभ

31 अगस्त के मंझन 12:15 बजे सबो आकाशवाणी केंद्र मन ले प्रसारित होही कार्यक्रम
रायपुर, मुख्यमंत्री श्री विष्णुदेव साय ह कहिन के सुशासन के सही मतलब तभे पूरा होही जब हमर ग्रामीण महिला मन सामाजिक, आर्थिक अऊ पारिवारिक रूप ले सशक्त बनहीं। इही दूरदर्शी सोच के संग छत्तीसगढ़ सरकार ह महिला मन ल आत्मनिर्भरता अऊ स्वावलंबन के दिशा म प्रेरित करे बर एक नवा ऐतिहासिक पहल करे हे।
राज्य ग्रामीण आजीविका मिशन (बिहान) के अंतर्गत तियार विशेष रेडियो कार्यक्रम “दीदी के गोठ” के शुभारंभ 31 अगस्त 2025 के मंझन 12:15 बजे करे जाही। ये कार्यक्रम आकाशवाणी रायपुर केंद्र संग प्रदेश के सबो आकाशवाणी केंद्र मन ले एक संग प्रसारित होही। संगे एखर लाइव स्ट्रीमिंग ऑनलाइन प्लेटफॉर्म (www.onlineradiofm.in/stations/all-india-air-raipur) म घलोक उपलब्ध रइही। दीदी के गोठ केवल एक रेडियो कार्यक्रम नइ हे, बल्कि ये मुख्यमंत्री श्री विष्णुदेव साय जी के सुशासन के सरकार के दूरदर्शी सोच के प्रतिबिंब हे।
ए उद्देश्य महिला मन के आवाज़ ल पूरा समाज तक पहुँचाना, ऊंखर संघर्ष अऊ उपलब्धि मन ल आगू लाना अऊ ओ मन ल शासन के योजना मन ले जोड़के सकारात्मक बदलाव के रद्दा दिखाना हे।
कार्यक्रम म मुख्यमंत्री श्री विष्णुदेव साय, भारत सरकार के केंद्रीय ग्रामीण विकास मंत्री अऊ राज्य के उप मुख्यमंत्री अऊ पंचायत अऊ ग्रामीण विकास मंत्री श्री विजय शर्मा ह ग्रामीण महिला मन के नाव विशेष संदेश अऊ प्रेरणादायी शुभकामना प्रसारित करे जाही। ये अवसर म ये कार्यक्रम के शुभारंभ होही, संगे शासन के नीति अऊ योजना मन ल सीधा जनता तक पहुँचाए के एक सशक्त माध्यम घलोक बनही।
दीदी के गोठ के प्रमुख उद्देश्य ग्रामीण अंचल के महिला मन ल शासन के कई ठन योजना मन ले जोड़ना, ओ मन ल स्वरोजगार के अवसर उपलब्‍ध करना अऊ आत्मनिर्भरता अऊ स्वावलंबन कोति अग्रसर करना हे। ए कार्यक्रम म स्व-सहायता समूह मन के सफल महिला मन के कहानी सुनाए जाही—कइसे उमन संघर्ष अऊ कठिनाइ मन ल पार करके अपन मेहनत अऊ आत्मविश्वास ले आर्थिक रूप ले मजबूती हासिल करे हें, संगे समाज म घलोक एक नवा पहिचान बनाय हें। आज छत्तीसगढ़ के लाखों महिला मन लखपति दीदी बन गे हे। ओखर जीवन बिहान योजना ले सकारात्मक रूप ले बदले हे। इनकर प्रेरणादायी कहानी मन रेडियो के आवाज़ के माध्यम ले हर गाँव अऊ हर घर तक पहुँचही, ताकि आन महिला मन घलोक आत्मनिर्भरता के रद्दा पकड़ सकंय।
खर कार्यक्रम के प्रभाव ल अऊ जादा व्यापक बनाए बर पंचायत, ग्राम संगठन अऊ संकुल संगठन स्तर म सामूहिक श्रवण के व्यवस्था करे जात हे। ये मां जनप्रतिनिधि, प्रशासनिक अधिकारी, स्थानीय समुदाय अऊ स्व-सहायता समूह के दीदी मन विशेष रूप ले सामिल होहीं। सामूहिक श्रवण ले ग्रामीण क्षेत्र मन म आपसी गोठ, चर्चा अऊ प्रेरणा के वातावरण बनही।