खेती-किसानी के योजना मन के लाभ बर डिजिटल किसान आईडी कार्ड बनवाना जरूरी किसान मन ले जल्दी पंजीयन कराय के अपील

एमसीबी, भारत सरकार कोति ले एग्रीस्टैक पहल के तहत किसान मन बर डिजिटल किसान आईडी कार्ड बनाना अनिवार्य करत हे। अवइया समय म खेती-किसानी के अलग-अलग योजना मन के लाभ पाय बर किसान आईडी होना जरूरी होही। कलेक्टर डी. राहुल वेंकट ह कृषि विभाग के अधिकारी मन ला निर्देश दे हें के किसान आईडी बनाए बर बड़े पैमाना म जागरूकता अभियान चलाए जाए अउ किसान मन ला जरूरी मदद पहुँचाए जाए। जिला के जम्मों किसान मन ले जल्दी अपन डिजिटल किसान आईडी कार्ड बनवाए के अपील करे गए हे, ताकि ओ मन सासन के योजना मन ले वंचित झन रहंय।
डिजिटल किसान आईडी कार्ड के माध्यम ले किसान मन ला प्रधानमंत्री फसल बीमा योजना, प्रधानमंत्री किसान सम्मान निधि, कृषि अनुदान अउ आन सरकारी योजना, सेवा सहकारी समिति म समर्थन मूल्य म धान बेचे, कृषि करजा समेत कई प्रकार के कृषि सेवा मन के लाभ आसानी ले मिल सकही। किसान आईडी बनवाए बर बी-1 (खसरा-खतौनी), आधार कार्ड अउ आधार ले जुड़े मोबाइल नंबर ला जरूरी कागद माने गे हे। इच्छुक किसान अपन नजदीकी लोक सेवा केंद्र (सीएससी) म जाके पंजीयन करा सकत हें या जादा जानकारी बर अपन क्षेत्र के कृषि अधिकारी या कृषि विस्तार अधिकारी ले संपर्क कर सकत हें। जिला प्रशासन ह किसान मन ले डिजिटल खेती ला बढ़ावा दे बर बढ़-चढ़ के हिस्सा लेय के अपील करे हे।