राज्य के सबो संभागीय मुख्यालय मन म स्थापित होही सरदार पटेल के प्रतिमा, रन फॉर यूनिटी ले दीन एकता के संदेश
रायपुर, राष्ट्रीय एकता दिवस म मुख्यमंत्री श्री विष्णु देव साय ह कहिन के सरदार वल्लभभाई पटेल ह अपन कर्मठता अऊ दृढ़ इच्छाशक्ति ले देश ल एक सूत्र म पिरोइन। स्वतंत्र भारत के पहिली उप प्रधानमंत्री अऊ गृह मंत्री के रूप म उमन 562 रियासत मन के विलय करके अखंड भारत के निर्माण करिन। मुख्यमंत्री ह रायपुर स्थित सरदार वल्लभभाई पटेल अंतरराष्ट्रीय हॉकी स्टेडियम म आयोजित कार्यक्रम म सरदार पटेल ल श्रद्धांजलि देवत कहिन के उंखर जीवन राष्ट्र के एकता अऊ अखंडता के चिन्हारी ये।
ए बेरा म उप मुख्यमंत्री श्री अरुण साव ह घोषणा करिन के राज्य के सबो संभागीय मुख्यालय मन म सरदार पटेल के भव्य प्रतिमा स्थापित करे जाही, जेखर बर नगरीय निकाय मन ल 50-50 लाख रूपिया देहे जाही। कार्यक्रम म मुख्यमंत्री ह स्वतंत्रता सेनानी मन के परिजन मन के सम्मान करिन अऊ उपस्थित जनता मन ल स्वदेशी अपनाए के शपथ देवाइन।
खेल अऊ युवा कल्याण विभाग कोति ले आयोजित ‘रन फॉर यूनिटी’ म बड़ संख्या म युवा मन ह भाग लीन। संगेच रंगोली, चित्रकला, भाषण अऊ काव्य पाठ प्रतियोगिता मनके विजेता मनल मुख्यमंत्री ह पुरस्कृत करिन। उमन ‘बस्तर ओलंपिक’ प्रचार रथ ल घलोक रवाना करिन। विभागीय सचिव श्री यशवंत कुमार ह बताइस कि ‘सरदार@150 यूनिटी मार्च’ के तहत कार्यक्रम डेढ़ महीना तक जारी रइही। कार्यक्रम म मंत्री, अधिकारी, खिलाड़ी अऊ छात्र-छात्रा मन बड़ संख्या म उपस्थित रहिन।
सरदार पटेल के कर्मठता ले बनिस अखंड भारत : मुख्यमंत्री साय
