- वार्ड नंबर 15 म गंदगी देखिन त सुपरवाइजर उपर जताईन गहिर नाराजगी
- पूरा शहर म सफाई व्यवस्था के करिन अवलोकन
- जिहां बने काम होवत हे उहां तारीफ घलोक करिन
दुर्ग, संभागायुक्त श्री दिलीप वासनीकर आज बिहनिया-बिहनिया सफाई व्यवस्था देखे सायकल म शहर के कई ठन वार्ड मन के दौरा म निकलिन। वार्ड नंबर 15 के ब्रिज तीर बहुत अकन कचरा देखके संभागायुक्त बिक्कट नाराज होइन अऊ उमन सुपरवाइजर आशीष साहू ल एला तीन दिन के भीतर साफ करे ल कहिन। उमन कहिन कि शहर के चौक-चौराहा मन के सुंदरता ले शहर के बनेच छबि बनथे अऊ ये संबंध म लापरवाही होथे त पूरा शहर के छबि खराब होथे। उमन कहिन कि शहर के जऊन इलाका मन म अइसन शिकायत जादा आथे उहां सरलग जांच करव। उन्हें अग्रसेन चौक के अंबे लाज तीर बहुत अकन कचरा बगरे रहिस। संभागायुक्त ह एखर बर डस्टबीन रखे के निर्देश दीन। उमन आयुक्त नगर निगम ल निगम क्षेत्र म बनाये जात गौठान के कार्रवाई एक हफ्ता म पूरा करे ल कहिन। अइसनहे वार्ड नंबर 26 म उमन सड़क के तीर बहुत अकन जमा कचरा देखिन। स्वच्छता सुपरवाइजर श्री संजय यादव ल एला ठीक करे के निर्देश दीन। उमन कहिन कि दुर्ग धमधा ओवरब्रिज म दुनों कोती सरलग साफ-सफाई करात रहव। संगेच ब्रिज के बाऊंड्रीवाल के पोताई के निर्देश घलोक उमन दीन। उमन ओवर ब्रिज के फुटपाथ के गड्ढा ल देखके नाराजगी घलोक जाहिर करिन। उमन नगर निगम आयुक्त ले लोक निर्माण विभाग ले संपर्क स्थापित करके एला ठीक कराए के निर्देश दीन। संभागायुक्त ह राजेंद्र पार्क चौक, शहीद चौक, दुर्ग धमधा ओवर ब्रिज, धमधा नाका, अग्रसेन चौक अऊ इंदिरा मार्केट म सफाई व्यवस्था के अवलोकन करिन। हम इहां बता देवन के संभागायुक्त ह बीते दिन नगर निगम के आयुक्त अऊ सीईओ के बैठक लेके सरलग साफ-सफाई के काम मन के अवलोकन करे के निर्देश दिए रहिन।
