छत्तीसगढ़ के मुख्यमंत्री विष्णुदेव साय ह केंद्रीय मंत्री नितिन गडकरी ले करिन मुलाकात
छत्तीसगढ़ म सड़क परियोजना अऊ आदिवासी क्षेत्र मन के कनेक्टिविटी उपर चर्चा
केंद्रीय सड़क निधि के अंतर्गत 1383 करोड़ के काम पास करे के गिलोली
नई दिल्ली, 18 जुलाई 2024। छत्तीसगढ़ के मुख्यमंत्री श्री विष्णुदेव साय ह आज केंद्रीय सड़क अउ परिवहन मंत्री श्री नितिन गडकरी ले ऊंखर घर म मुलाकात करिन। उमन बैठक म राज्य म चलत सड़क परियोजना अऊ आदिवासी क्षेत्र ल अयोध्या तक सीधा जोड़े उपर गोठ-बात होइस। मुख्यमंत्री ह राज्य म सड़क परिवहन ल अऊ जादा सुलभ अउ सुविधाजनक बनाए बर नवा राष्ट्रीय राजमार्ग परियोजना मन के प्रस्ताव रखिन। ए बात म केंद्रीय मंत्री श्री गडकरी ह विभागीय अधिकारी मन ल जरूरी निर्देश दीन।
बैठक म उपमुख्यमंत्री श्री अरुण साव अऊ वित्त मंत्री श्री ओपी चौधरी, छत्तीसगढ़ के मुख्यमंत्री के सचिव पी दयानंद, राहुल भगत, लोक निर्माण विभाग के सचिव कमलप्रीत सिंह संग आन विभागीय अधिकारी अऊ भारत सरकार के अधिकारी घलोक उपस्थित रहिन।
बैठक म मुख्यमंत्री श्री विष्णुदेव साय ह राज्य के सामाजिक अउ आर्थिक उन्नति अउ आदिवासी वनांचल ल मुख्य मार्ग ले जोड़े बर नवा राष्ट्रीय राजमार्ग के प्रस्ताव रखिन। मुख्यमंत्री ह रायगढ़-धरमजयगढ़-मैनपाट-अंबिकापुर-उत्तरप्रदेश सीमा तक कुल 282 किलो मीटर तक के मार्ग ल राष्ट्रीय राजमार्ग घोषित करे के मांग करे हें। श्री साय ह बताइन के ये मार्ग प्रदेश के चार जिला ले होके गुजरथे अउ धार्मिक नगरी अयोध्या ले छत्तीसगढ़ राज्य ल जोड़इया इही मुख्य मार्ग ये।
मुख्यमंत्री ह कवर्धा-राजनांदगांव-भानुप्रतापपुर-अंतागढ़-नारायणपुर-गीदम-दंतेवाड़ा-सुकमा मार्ग ल घलोक राष्ट्रीय राजमार्ग घोषित करे के आग्रह करिन। मुख्यमंत्री ह बताइन के ये कुल 482 किलो मीटर लंबा राज्य के कुल 6 राष्ट्रीय राजमार्ग अउ 5 जिला मुख्यालय ल जोड़े वाला अति महत्वपूर्ण मार्ग हे। ए मार्ग के निर्माण होए ले बस्तर के नक्सल प्रभावित क्षेत्र ह मुख्यमार्ग ले जुड़ जाही अउ नक्सल गतिविधियों म कमी आही।
एखर संगेच उमन कहिन रायपुर शहर ले तीन राष्ट्रीय राजमार्ग गुजरथे। एनएच 130बी ले 53 ल जोड़इया मार्ग ल राष्ट्रीय राजमार्ग घोषित करे के मांग हमन करे हन। उमन बताईन के ये मार्ग एनएच घोषित होए ले रायपुर शहर के रिंग रोड पूरा राष्ट्रीय राजमार्ग हो जाही।
एखर अलावा उमन रतनपुर-लोरमी-मुंगेली-नांदघाट-भाटापारा-बलौदाबाजार मार्ग, केंवची-पेंड्रारोड-पसान-कटघोरा मार्ग, मुंगेली-नवागढ़-बेमेतरा-धमधा-दुर्ग-झलमला मार्ग, राजनांदगाँव-मोहला-मानपुर मार्ग, पंडरिया-बजाग-गाड़ासरई मार्ग ल घलोक राष्ट्रीय राजमार्ग घोषित करे के प्रस्ताव मुख्यमंत्री ह रखे हे।
मुख्यमंत्री श्री साय ह राष्ट्रीय राजमार्ग नंबर 130 म कटघोरा ले अंबिकापुर तक फोर लेन चौड़ीकरण करे अउ एनएच नंबर 53 म टाटीबंध ले तेलीबांधा तक सुरक्षित यातायात के दृष्टि ले सरोना चौक, उद्योग भवन, अऊ तेलीबांधा चौक म निर्माण के जरूरत बताए हे।
एखर संगेच उमन राष्ट्रीय राजमार्ग के वार्षिक योजना 2024-25 म एनएच 30 धमतरी ले जगदलपुर अउ एनएच 130बी म रायपुर-बलौदाबाजार-सारंगढ़ मार्ग फोर लेन करे के प्रस्ताव रखे हे। उहें, रायपुर-दुर्ग एनएच 53 के दू जंक्शन सिरसा गेट अउ खुर्सीपार जंक्शन म निर्माण के स्वीकृति के आग्रह करे हें।
मुख्यमंत्री ह बताइस कि केंद्रीय सड़क निधि के अंतर्गत 1383 करोड़ के 13 काम मन के प्रस्ताव मंत्रालय ल भेजे गए हे। उमन प्रस्ताव मन ल जल्दी पास करे के अनुरोध करिन।
मुलाक़ात के समय मुख्यमंत्री ह रायपुर म नवंबर म होवइया इंडियन रोड कॉंग्रेस के 83वां वार्षिक अधिवेशन म सामिल होए बर केंद्रीय मंत्री ल आमंत्रण घलोक दीन।
केंद्रीय मंत्री श्री नितिन गडकरी ह छत्तीसगढ़ म सड़क बुनियादी ढांचा ल मजबूत करे बर कई ठन प्रस्ताव मन उपर जल्दी सकारात्मक पहल करे के आश्वासन देहे हें।