रायपुर, मुख्यमंत्री के निर्देश म पुलिस महानिदेशक श्री डी.एम. अवस्थी ह आज कांकेर जिला के नक्सल प्रभावित क्षेत्र कोयलीबेड़ा म नक्सल अभियान अऊ कानून व्यवस्था के समीक्षा करिन। ऊंखर संग बस्तर रेंज के पुलिस महानिरीक्षक श्री सुन्दरराज पी., सीमा सुरक्षा बल के पुलिस महानिरीक्षक, उप पुलिस महानिरीक्षक अऊ जिला पुलिस अधीक्षक घलोक उपस्थित रहिन। श्री अवस्थी ह नक्सल अभियान के तहत आधिकारी मन ल हुकुम दीन, कि पुलिस ल मिले सूचना मन के सत्यता के जांच करत सर्चिंग अभियान चलाय जाना चाही अऊ ये घलोक ध्यान रखव कि पुलिस कोति ले चलाए जात सर्चिंग अभियान ले क्षेत्र के ग्रामीण जन ल कोनो प्रकार के परेशानी अऊ असुविधा नइ होनी चाही। उमन ये घलोक हुकुम दीन कि केन्द्रीय अर्द्धसैनिक बल मन के जवान मन अऊ राज्य पुलिस के जवान मन के सुरक्षा घलोक सुनिश्चित होना चाही। श्री अवस्थी ह कहिन कि राज्य के ग्रामीण अंचल मन म पंचायत चुनाव प्रक्रिया चलत हे। चुनाव शांतिपूर्ण ढंग ले सुनिश्चित कराना पुलिस के अहम जिम्मेदारी हे। उमन संवेदनशील क्षेत्र मन के पहिचान करके सुरक्षा के सबो प्रबंध पहिली ले कर लेहे के निर्देश दीन। उमन कहिन कि राज्य म पाछू दिन सबो चुनाव शांतिपूर्ण ढंग ले पूरा कराए बर भारत निर्वाचन आयोग ह घलोक सराहना करे हे। राज्य पुलिस त्रिस्तरीय पंचायत के चुनाव घलोक शांति पूर्ण निष्पक्ष ढंग ले पूरा करावव ताकि राष्ट्रीय स्तर म छत्तीसगढ़ पुलिस के सक्रियता के पहिचान बन सकय।
नक्सल प्रभावित क्षेत्र म पुलिस महानिदेशक ह कानून व्यवस्था के करिन समीक्षा
