संस्कृति संचालनालय के आफिस अब लउहे नवा रईपुर म

रायपुर, 9 जुलाई 20121। राजधानी रायपुर स्थित संस्कृति संचालनालय जल्दीच नवा रायपुर म शिफ्ट हो जाही। संस्कृति मंत्री श्री अमरजीत भगत ह आज नवा रायपुर सेक्टर 27 म बने छत्तीसगढ़ गृह निर्माण मंडल के भवन जेन संस्कृति परिषद कार्यालय बर प्रस्तावित हे, के निरीक्षण करिन। जानबा हे कि राज्य सरकार कोति ले छत्तीसगढ़ के संस्कृति के संरक्षण अऊ संवर्धन के संगें-संग ये विधा के प्रति मनखे मन ल प्रोत्साहित करे बर छत्तीसगढ़ संस्कृति परिषद के गठन करे गए हे। संस्कृति परिषद के अंतर्गत साहित्य अकादमी, कला अकादमी, आदिवासी लोक कला अकादमी, छत्तीसगढ़ फिल्म विकास निगम, छत्तीसगढ़ सिंधी अकादमी अऊ छत्तीसगढ़ राजभाषा आयोग संचालित होही। संस्कृति विभाग के अधीन संचालित सबो प्रभाग मन ल एक अम्ब्रेला के नीचे काम करे के अवधारणा ल लेके जल्दीच अमल म लात संस्कृति संचालनालय ल जुन्ना रायपुर ले नवा रायपुर म शिफ्ट करे के तैयारी करे जात हे।
मंत्री श्री भगत ह भवन निरीक्षण के बेरा म कहिन के छत्तीसगढ़ी संस्कृति के मुताबिक कार्यालय के सुसज्जित स्वरूप होवय। कार्यालय भवन म रिसेप्शन के कर्मचारी अऊ गाइड अपडेटेड रइहीं त आन राज्य अऊ विदेश ले अवइया पर्यटक, कलाकार अउ नागरिक मन ल छत्तीसगढ़ी, हिन्दी अउ अंगरेजी म विस्तार ले छत्तीसगढ़ी संस्कृति के बारे म जानकारी देहे जा सकय। मंत्री श्री भगत ह कार्यालय भवन म सबो अकादमी, फिल्म विकास निगम मंडल के अध्यक्ष अउ सदस्य मन बर घलोक बैठक व्यवस्था करे के निर्देश अधिकारी मन ल दीन। उमन कहिन कि एक अम्ब्रेला के नीचे सबो प्रभाग मन ल लाय के अवधारणा पूरा होना चाही, जेखर से कार्यालय अवइया नागरिक, कलाकार, बुद्धजीवी मन ल एकर लाभ मिल सकय। उमन आगंतुक मन के चाय-नाश्ता, भोजन आदि बर गढ़कलेवा या कैंटिन संचालित करे म घलोक जोर दीन।
मंत्री श्री भगत ह संस्कृति परिषद् बर प्रस्तावित कार्यालय भवन के निरीक्षण के बाद कर्मचारी, अधिकारी, अध्यक्ष, उपाध्यक्ष अऊ सदस्य मन बर टेबल-कुर्सी के व्यवस्था संग बिजली, पंखा अऊ साफ-सफाई व्यवस्था दुरूस्त करे के घलोक निर्देश दीन। ये बेरा म संस्कृति अउ पुरातत्व विभाग के सचिव श्री अन्बलगन पी., संस्कृति विभाग के संचालक श्री विवेक आचार्य संग छत्तीसगढ़ गृह निर्माण मंडल व संस्कृति विभाग के वरिष्ठ अधिकारी उपस्थित रहिन।