रायपुर, 26 जून 2020। छत्तीसगढ़ शासन के समाज कल्याण विभाग कोति ले संचालित निःशक्तजन विवाह प्रोत्साहन योजना के तहत मिले एक लाख रूपिया प्रोत्साहन राशि ले जांजगीर चांपा जिला के नवागढ़ के ग्राम सिउड़ के निःशक्त नवदम्पति अपन जीवन यापन बर स्व रोजगार शुरू करहीं। योजना के तहत लाभान्वित श्रीमती रूखमणी अउ श्री सत्येन्द्र दूनो श्रवण बाधित हें। चेक मिले म नवदम्पति ह कहिन के ओ मन आर्थिक रूप ले सक्षम बने बर कम्प्यूटर अउ फोटो कॉपी सेंटर के व्यवसाय चालू करहीं। ओ मन कोनो उपर निर्भर नइ रहना चाहत हें। उंखर स्व-रोजगार के इच्छा निःशक्तजन विवाह प्रोत्साहन योजना ह पूरा करे हे। उमन राज्य सरकार के ये योजना ल निःशक्तजन मन ल सक्षम बनाए बर बहुत उपयोगी बतात आभार व्यक्त करे हें।
विभाग के उप संचालक श्री टीपी भावे ह बताइस के निःशक्तजन विवाह प्रोत्साहन योजना के तहत वर या वधु के निःशक्त होए म प्रोत्साहन राशि देहे के प्रावधान हे। एखर बर जरूरी कागद के संग निरधारित प्रारूप मे आवेदन करना होथे। समाज कल्याण विभाग कोति ले पात्रता अनुसार स्वीकृति प्रदान करे जाथे। रूखमणी अउ सत्येन्द्र दूनो श्रवण बाधित होए म प्रोत्साहन राशि प्रदान करे गीस। नवदम्पत्ति ल जिला पंचायत अध्यक्ष श्रीमती यनिता यशवंत चंद्रा, संग गणमान्य नागरिक मन ह चेक प्रदान करत उज्जवल भविष्य के शुभकामना दीन।
