खरीफ सीजन के मजबूत तैयारी, पउर साल के तुलना म अब तक 141 प्रतिशत सुपर फास्फेट अऊ 125 प्रतिशत एनपीके खाद मिलीस

किसान मन बर समय म ठउका करे जात हे खाद-बीज के उपलब्धता
बेमेतरा म 2649 मीट्रिक टन एसएसपी अऊ 515 मीट्रिक टन एनपीके समिति मन म उपलब्‍ध
बेमेतरा, जिला म खरीफ फसल मन के बोनी लगभग पूर्णता के स्थिति म हे। कई जगा म धान के रोपई के काम घलोक चालू हो गए हे। एखर बीच किसान मन ल खाद अऊ बीज के कोनो कमी झन होवय, एखर बर बेमेतरा जिला प्रशासन अऊ कृषि विभाग कोति ले व्यापक तैयारी करे गए हे। जिला प्रशासन कोति ले खरीफ सीजन के तैयारी मन के सरलग समीक्षा करे जात हे। कृषि विभाग के अधिकारी मन ह बताइन के ए साल बेमेतरा जिला म पउर साल के तुलना म 141 प्रतिशत सिंगल सुपर फास्फेट अऊ 125 प्रतिशत एनपीके खाद के आपूर्ति होए हे। डीएपी खाद के मुकाबला एसएसपी अऊ एनपीके खाद घलोक बहुत उपयोगी अऊ पोषक तत्व मन ले भरपूर हे। एसएसपी म 16 प्रतिशत फास्फोरस अऊ 11 प्रतिशत सल्फर होथे, जेन फसल मन के सुग्‍घर बढ़ोतरी बर लाभकारी हे।
कृषि विभाग के अधिकारी मन ह बताइन के राज्य शासन ह ए साल सहकारी समिति मन अऊ निजी दुकान मन के खाद आबंटन के अनुपात 70:30 रखे हे, जबकि पहिली ये 60:40 रहिस। ए व्यवस्था के तहत 70 प्रतिशत या एखर ले जादा खाद रैक पॉइंट ले मार्कफेड के माध्यम ले बेमेतरा ल मिलत हे। बेमेतरा जिला ल अब तक कुल 51 हजार 054 मीट्रिक टन खाद मिल गे हे, जेन ए साल के संशोधित लक्ष्य 65 हजार 015 मीट्रिक टन के करीब 79 प्रतिशत हे। ये पउर साल के कुल खाद वितरण के 84 प्रतिशत हे। जिला म किसान मन ल अब तक 42 हजार 988 मीट्रिक टन खाद के वितरण हो चुके हे, जेन कुल उपलब्धता के 66 प्रतिशत ले जादा हे।