छत्तीसगढ़ म 62 हजार ले जादा परिवार मन ल भोजन अऊ निशुल्क राशन सामान के वितरण

• मुख्यमंत्री के निर्देश म जल्दी अमल
• बड़ संख्या म स्‍वयं सेवी संस्था मन अऊ संगठन, जरूरतमंद मन के मदद बर आगू आइन

रायपुर, 30 मार्च 2020। कोरोना वायरस (कोविड-19) के संक्रमण ले बचाव अऊ रोकथाम के उपाय मन के तहत होए लॉकडाउन के बेरा म छत्तीसगढ़ के सबो शहर अऊ गांव मन म 62 हजार 172 गरीब अऊ जरूरतमंद परिवार मन ल निशुल्क भोजन अऊ निशुल्क राशन उपलब्‍ध कराए जात हे। जेखर से ए परिवार मन ल बड़ राहत मिले हे।

मुख्यमंत्री श्री भूपेश बघेल ह सबो जिला कलेक्टर मन ल ये काम ल पूरा संवेदनशीलता ले करे के निर्देश देहे हें। उमन कहिन हे के ये चुनौतीपूर्ण समय म कोनो मनखे भूखा झन रहय। मुख्यमंत्री के आव्हान म बहुत अकन समाजसेवी संस्था मन गरीब मन अऊ जरूरतमंद परिवार के मदद बर आगू आए हें अऊ जिला प्रशासन के अधिकारी मन के संग खांध ले खांध मिलाके ये काम मे सहयोग देवत हें।

पूरा प्रदेश म 62 हजार 172 मनखे मन ल भोजन अऊ राशन सामान उपलब्‍ध कराए गए हे। प्रदेश म संबंधित जिला मन म जिला प्रशासन कोति ले 14 हजार 467 मनखे अऊ 4015 परिवार ल निशुल्क राशन सामान वितरित करे गए हे, जबकि 28 हजार 227 मनखे मन के भोजन के व्यवस्था करे गए हे। समाजसेवी संगठन मन कोति ले पूरा प्रदेश म 18 हजार 638 मनखे अऊ 18 हजार 097 परिवार बर भोजन अऊ निशुल्क राशन सामान के प्रबंध करे गए हे। एमां ले राजधानी रायपुर म 9 हजार मनखे अऊ 22 हजार परिवार ल भोजन अऊ राशन सामान उपलब्‍ध कराए गए हे। रायपुर म 9000 मनखे मन बर भोजन के व्यवस्था करे गए हे जबकि 4000 जरूरतमंद परिवार मन ल निशुल्क राशन सामान वितरित करे गए हे। एखर अलावा स्वयंसेवी संगठनों कोति ले 18 हजार परिवार मन बर भोजन अऊ राशन के व्यवस्था करे गए हे।

अइसनहे सरगुजा जिला म 11हजार 550 जरूरतमंद मनखे मन बर भोजन अऊ राशन के व्यवस्था करे गए हे। एमां ले 4900 मनखे मन के भोजन के व्यवस्था अऊ 1500 मनखे मन ल निशुल्क राशन अऊ स्वयंसेवी संगठन मन कोति ले 5150 मनखे मन बर भोजन अऊ राशन के व्यवस्था करे गए हे। बस्तर जिला म ये योजना के माध्यम ले 5963 जरूरतमंद मनखे ल मदद करे जात हे। बस्तर जिला म 2180 मनखे मन के भोजन के व्यवस्था करे गए हे अऊ 1033 परिवार ल निशुल्क राशन सामान देहे गए हे जबकि स्वयंसेवी संस्था मन कोति ले बस्तर जिला म 2750 मनखे मन के भोजन के अऊ राशन के व्यवस्था करे गए हे।