जूनियर अधिवक्ता मन के ट्रेनिंग बर बनही कार्ययोजना : श्री भूपेश बघेल

Surabhi Tiwari
  • दुर्ग म बार एसोसिएशन के कक्ष होही रिनोवेट, लाइब्रेरी घलोक अपग्रेडेड होही
  • मुख्यमंत्री ह जिला अधिवक्ता संघ दुर्ग के शपथ ग्रहण समारोह म करिन घोषणा

दुर्ग, मुख्यमंत्री श्री भूपेश बघेल ह कहिन कि जूनियर अधिवक्ता मन ल न्यायालयीन काम-काज के ट्रेनिंग देहे बर कार्ययोजना तियार करे जाही। ट्रेनिंग ले जूनियर अधिवक्ता मन ल फील्ड म काम करे म जिहां जादा सुविधा होही, उहें न्याय के मांग करइया नागरिक मन ल घलोक एकर लाभ मिलही। मुख्यमंत्री श्री भूपेश बघेल ह आज अपन निवास कार्यालय ले जिला अधिवक्ता संघ दुर्ग के शपथ ग्रहण कार्यक्रम ल सम्बोधित करत ये बात कहिन। श्री बघेल ह कार्यक्रम म दुर्ग बार एसोसिएशन के कक्ष म आदर्श बैठक व्यवस्था अऊ लाइब्रेरी के आधुनिकीकरण बर मंजूरी दीन।
मुख्यमंत्री ह कहिन कि कानून के पढ़ाई करे के बाद जब जूनियर वकील न्यायालय आथें त न्यायालय के कार्रवाई के पद्धति आदि के ज्ञान कम होए के सेती ओ मन ल आरंभिक रूप ले काफी कठिनाई होथे, एखर निराकरण बर विधि विभाग कोति ले प्रशिक्षण के कार्ययोजना बनाय जाही। उमन कहिन कि वकील के कार्यक्षेत्र व्यापक होथे। ओ मन ल तहसीलदार, एसडीएम, कलेक्टर आदि के न्यायालय मन म घलोक जाना होथे। निर्वाचन के समय घलोक अभ्यर्थी ऊंखर संपर्क म आथें अऊ बहुत अकन कागद बर प्रत्याशी वकील मन तीर जाथें। कहूं अधिवक्ता प्रशिक्षित होही, त ओ मन जादा बेहतर तरीका ले अपन काम कर पाहीं।
कार्यक्रम के समय जिला अऊ सत्र न्यायाधीश श्री राजेश श्रीवास्तव ह जूनियर अधिवक्ता मन के प्रशिक्षण के संबंध म ये सुझाव मुख्यमंत्री के आगू रखे रहिन। मुख्यमंत्री श्री बघेल ह ऊंखर सुझाव के सराहना करत एला उपयोगी बताइन अऊ जूनियर अधिवक्ता मन के प्रशिक्षण के स्वरूप अऊ कई पहलु मन उपर ड्राफ्ट तियार करे के जिम्मेदारी जिला अऊ सत्र न्यायाधीश श्री राजेश श्रीवास्तव ल सौंपिन। उमन कहिन कि ड्राफ्ट तियार करके ओ मन एला राज्य शासन के विधि विभाग ल भेजयं। जेकर उपर जरूरी निर्णय लेहे जाही।
मुख्यमंत्री ह ये बेरा अपन संबोधन म देश अऊ प्रदेश म वकालत के उज्ज्वल परंपरा म घलोक प्रकाश डारिन। मुख्यमंत्री ह कहिन कि हमार स्वतंत्रता संग्राम सेनानी गांधी, नेहरू, पटेल, अंबेडकर, डा. राजेंद्र प्रसाद जैसी विभूति मन ह स्वतंत्रता संग्राम के लड़ाई न्यायालय के भीतर घलोक लडि़न अऊ बाहिर घलोक लडि़न। देश के आजादी म वकील मन के बड़का योगदान हे। प्रदेश म घलोक बैरिस्टर छेदीलाल, घनश्याम गुप्त, ठाकुर प्यारेलाल जइसे विभूति मन ह अपन कानूनी ज्ञान ले बड़का योगदान दीन। दुर्ग ले घनश्याम गुप्त तो संविधान के हिंदी ड्राफ्ट कमेटी के अध्यक्ष घलोक रहिन। उमन कहिन कि हिदायतुल्लाह जइसे विभूति के नाम म छत्तीसगढ़ म विधि विश्वविद्यालय हे। उमन कहिन कि ये उज्ज्वल परंपरा ल आगू बढ़ाना हे अऊ आप मन एखर बर बेहद सजग होके काम करत हव।
ये मौका म जिला अऊ सत्र न्यायाधीश श्री राजेश श्रीवास्तव ह अपन संबोधन म कहिन कि दुर्ग जिला म 13 महीना म 16 हजार 322 प्रकरण निराकृत होए हे, जबकि ये अवधि म कोविड के सेती कुछ समय न्यायालय बंद घलोक रहे हे। ये मौका म उमन संघ के 9 पदाधिकारी अऊ छै कार्यसमिति के सदस्य मन ल शपथ देवाइन। अधिवक्ता संघ के अध्यक्ष सुश्री नीता जैन ह ये मौका म कहिन कि शपथ ग्रहण के मौका बेहद अहम होथे। ये हमर परंपरा रहे हे ताकि हम अपन कर्तव्य मन के निष्ठा ले पालन करन। वरिष्ठ उपाध्यक्ष श्री प्रशांत जोशी ह आभार व्यक्त करिस। अधिवक्ता संघ के तरफ ले श्री आशीष तिवारी मुख्यमंत्री कार्यालय ले कार्यक्रम म जुडि़न। जिला न्यायालय दुर्ग म आयोजित समारोह म सचिव श्री रविशंकर सिंह, महिला उपाध्यक्ष सुश्री सुनीता कसार, कोषाध्यक्ष श्री अनिल जायसवाल, सह सचिव श्री कृष्ण राज चंदेल, सांस्कृतिक अऊ क्रीड़ा सचिव सुश्री मोनिका सिंह, ग्रंथालय सचिव श्री द्रोण ताम्रकर अऊ श्री कुलेश्वर साहू संग अधिवक्ता संघ के कार्यकारिणी सदस्य अऊ बड़ संख्या म अधिवक्ता गण उपस्थित रहिन। ये मौका म ये कार्यक्रम के सुचारू संचान म संघ के मीडिया प्रभारी श्री मनोज मिश्रा के बड़का योगदान रहिस।
कार्यक्रम के पूरा वीडियो देखव-

कार्यक्रम के बाद मुख्‍यमंत्री श्री भूपेश बघेल ह ए बारे म अपन ट्वीटर हैंडल ले ट्वीट तको करिन-

लउछरहा..