स्वास्थ्य मंत्री श्री जायसवाल ह कोण्डागांव अउ फरसगांव म शासकीय अस्पताल मन के करिन निरीक्षण

स्वास्थ्य मंत्री ह के जिला अस्पताल कोंडागांव म 80 लाख रुपिया के लागत ले ऑपरेशन थिएटर निर्माण के करिन घोषणा
आमजनता ल बेहतर स्वास्थ्य सुविधा उपलब्ध कराए बर दीन निर्देश
कोंडागांव, प्रदेश के लोक स्वास्थ्य अऊ परिवार कल्याण, चिकित्सा शिक्षा मंत्री श्री श्याम बिहारी जायसवाल ह काली कोंडागांव जिला के दउरा के बेरा म जिला चिकित्सालय कोंडागांव अऊ सामुदायिक स्वास्थ्य केन्द्र फरसगांव के उदुपहा जांच करिन। ए बेरा म स्वास्थ्य मंत्री श्री जायसवाल ह मरीज मन ले बातचीत करके हाल चाल जानिन अऊ उहां मिलत चिकित्सकीय सुविधा मन के जानकारी लीन। स्वास्थ्य मंत्री ह स्वास्थ्य विभाग के अधिकारी मन ले अस्पताल म पहुंचइया मरीज मन के बेहतर ईलाज के सुविधा उपलब्ध कराए के निर्देश दीन। ए बेरा म बेहतर स्वास्थ्य सुविधा मन के विस्तार बर स्वास्थ्य मंत्री ह जिला अस्पताल कोंडागांव म 80 लाख रुपिया के लागत ले ऑपरेशन थिएटर निर्माण के घोषणा करिन।
उमन कहिन के राज्य के नागरिक मन ल बेहतर स्वास्थ्य सुविधा उपलब्ध कराना शासन के प्राथमिकता हे। निरीक्षण के समय ऊंखर संग  बस्तर विकास प्राधिकरण के उपाध्यक्ष अऊ स्थानीय विधायक सुश्री लता उसेंडी, छत्तीसगढ़ मेडिकल सर्विस कॉरपोरेशन लिमिटेड के अध्यक्ष श्री दीपक म्हस्के, स्वास्थ्य सचिव श्री अमित कटारिया अऊ कलेक्टर श्रीमती नुपूर राशि पन्ना घलोक उपस्थित रहिन।
स्वास्थ्य मंत्री श्री श्याम बिहारी जायसवाल ह जिला चिकित्सालय म आपातकालीन चिकित्सा कक्ष, मेजर ओटी वार्ड, सर्जिकल वार्ड संग कई ठन वार्ड मन के जांच करिन। उमन अस्पताल म उपलब्ध सुविधा, दवई मन के उपलब्धता, साफ-सफाई, मरीज मन ल मिलइया जेवन, मेडिकल स्टाफ संग आन जरूरी जानकारी लीन। जिला अस्पताल म चलत मरम्मत काम के प्रगति के जानकारी लेत उमन सीजीएमएससी के अधिकारी मन ले एक हफ्ता के भीतर रिपोट प्रस्तुत करे के निर्देश दीन। उमन जिला चिकित्सालय म मरीज मन के संख्या ल देखत बेड के संख्या बढ़ाए अऊ नवा ऑपरेशन थिऐटर निर्माण कराए के बात कहिन।