- छत्तीसगढ़ी कलेवा महमहाही, गेड़ी नाच अऊ भंवरा के होही प्रदर्शन
- 26 विधा मन म भाग लेहीं जिला के भाग लेवइया
जांजगीर-चांपा, राज्य स्तरीय युवा महोत्सव के आयोजन राजधानी रायपुर म 12 जनवरी ले होवत हे। जिला के कई वर्गो के कुल 178 भाग लेवइया खिलाड़ी कई विधा मन म अपन प्रतिभा के प्रदर्शन करहीं। एमां 37 महिला अउ 119 पुरूष भाग लेवइया सामिल हे। एखर अलावा 40 साल ले उपर के आयु वाले 22 भाग लेवईया मन ल घलोक मौका देहे गए हे।
मिले जानकारी के मुताबिक निबंध म अन्नु पटेल, क्वीज म कृष्णा शर्मा, वाद-विवाद म सुशील बरेठ, चित्रकला म लोकेश कुमार सिदार, पारंपरिक वेशभूषा म नेहा सिदार, फूड फेस्टिवल म शिवकला साहू, फुगड़ी म सरस्वती टंडन, भंवरा म सावन कुमार, बासुंरी म तीर्थरमण अउ विकास राजे द्विवेदी, तबला म कमलेश्वर चौहान अउ दीपक कुमार कंवर, हारमोनियम म लक्ष्मीनारायण कुर्रे अउ हरप्रसाद बंजारे, तात्कालीक भाषण म चन्द्रभान सिंह अउ मनहरण राय, निबंध म धरमदास मानिकपुरी, शास्त्रीय गायन म कुशल महंत अउ दिनेश कुमार साहू, गिटार म राजू साहू, भरतनाट्यम म जमीन कैवर्त्य, कत्थक म विभूति पटेल कोति ले अपन विधा मन के प्रदर्शन करे जाही। एखर अलावा लोकनृत्य म 20, लोकगीत म 10, एकांकी नाटक म 11, राउत नाचा व गेड़ी नाचा म 18-18, डंडा नाच म 19, कबड्डी व खो-खो म 12-12 अऊ राक बैंड म 12 भाग लेवइया हिस्सा लेहीं। भाग लेवईया मन के संग प्रबंधक दल के 12 सदस्य मन ल परिवहन अउ आन व्यवस्था बर जिम्मेदारी सौंपे गए हे।
हम आप ल बात देवन के छत्तीसगढ़ शासन के सोंच के मुताबिक गढ़बो नवा छत्तीसगढ़ के थीम म जिला अउ विकासखण्ड स्तरीय युवा महोत्सव के आयोजन एक नवंबर ले करे जात हे। ये महोत्सव ले ग्रामीण प्रतिभा मन ल उंखर योग्यता मुताबिक मंच देवाए के उदीम करेगए हे। विकासखण्ड स्तर म आयोजित महोत्सव म पहिली स्थान पाए भाग लेवईया मन ल जिला मुख्यालय जांजगीर म 23 व 24 नंवबर के आयोजित जिला स्तरीय युवा महोत्सव म अपन प्रतिभा देखाय के अवसर मिले रहिस। जिलास्तरीय महोत्सव म चुने गए 178 भाग लेवईया मन ल अब युवा दिवस के अवसर म आयोजित होवइया राज्य स्तरीय युवा महोत्सव म अपन प्रतिभा देखाय के अवसर मिलही।
