लाइसेंस अऊ पंजीयन संबंधी काम मन म आमजन ल मिलही बड़ सुविधा
रायपुर, 19 मई 2025/ मुख्यमंत्री श्री विष्णुदेव साय ह आज मुंगेली जिला के पथरिया विकासखंड के ग्राम बछेरा म 1 करोड़ 72 लाख रूपिया के लागत ले नवा बने जिला परिवहन कार्यालय भवन के लोकार्पण करिन। उमन कहिन कि अड़बड़ दिन ले जिला म स्थायी परिवहन कार्यालय भवन के सुविधा के अभाव रहिस, जेखर से आम नागरिक मन ल लाइसेंस, वाहन पंजीयन अऊ आन काम मन म कठिनाई होत रहिस। अब नवा भवन के संग ये सुविधा स्थानीय स्तर म ही उपलब्ध हो सकही, जेखर से जनता ल काफी राहत मिलही।
लोकार्पण अवसर म मुख्यमंत्री ह पांच आवेदक मन ल चिनहा स्वरूप लर्निंग लाइसेंस प्रदान करिन, जेखर से ऊंखर चेहरा म खुशी झलक उठिस। ए बेरा म उमन कहिन के प्रदेश सरकार के प्राथमिकता जनता ल समयबद्ध अऊ सुगम सेवा उपलब्ध कराना हे। नवा कार्यालय भवन के माध्यम ले वाहन पंजीयन, ड्राइविंग लाइसेंस संग सबो प्रमुख सेवा मन एके परिसर म उपलब्ध होही।
छै एकड़ जमीन म बने ए परिसर म एक एकड़ म कार्यालय भवन अउ पाँच एकड़ क्षेत्र ड्राइविंग टेस्ट अऊ फिटनेस टेस्टिंग सेंटर बर आरक्षित रखे गए हे। भवन म 18 कक्ष, 6 हॉल, अटैच लेट-बाथ अउ सामान्य शौचालय जइसे आधारभूत सुविधा उपलब्ध कराए गए हे। कार्यालय ल पूरा सुविधायुक्त रूप म डिजाइन करे गए हे, जेखर से विभागीय काम मन के दक्षता घलोक बाढ़ही।
जानबा हे कि साल 2021-22 ले अब तक जिला म 11,721 ड्राइविंग लाइसेंस बन गए हे अऊ 49,000 ले जादा वाहन के पंजीयन हो चुके हे। ये आंकड़ा देखाथे के मनखे मन म परिवहन सेवा के बड़ मांग हे, जेन ल ये नवा कार्यालय सुगमता ले पूरा करही। मुख्यमंत्री श्री साय ह कहिन के प्रदेश म विकास ल गति देहे के संगे-संग प्रशासनिक दक्षता अऊ सेवा-सुलभता ल बढ़ाना हमर सरकार के सरलग प्रयास हे।
एखर बेरा म केंद्रीय राज्य मंत्री श्री तोखन साहू, उप मुख्यमंत्री श्री अरुण साव, विधायक श्री पुन्नूलाल मोहले, श्री धरमलाल कौशिक, मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध सिंह, मुख्यमंत्री के सचिव श्री पी दयानंद संग आन अधिकारीगण अउ जनप्रतिनिधि उपस्थित रहिन।