कमिश्‍नर ह बिहंचे 10 बजे कार्यालय मन के करिन जांच

राजनांदगांव, संभागायुक्त दुर्ग संभाग श्री महादेव कावरे ह राजनांदगांव जिला के अनुविभागीय अधिकारी, राजस्व कार्यालय, तहसील कार्यालय, जनपद पंचायत अउ नगर पंचायत कार्यालय मन के जांच करिन।
कार्यालय खुले के बेरा उमन नगर पंचायत डोंगरगांव के आफिस म पहुंचिन ये बेरा म कुल 7 कर्मचारी अनुपस्थित पाए गीस। मुख्य नगर पंचायत अधिकरी, नगर पंचायत डोंगरगांव अउ अनुपस्थित कर्मचारी मन ल कारण बताओ नोटिस जारी करे गीस अउ आन अधिकारी कर्मचारी मन ल निरधारित कार्यालयीन समय म उपस्थित रहे के हुकुम देहे गीस। श्री कावरे ह उहां उपस्थित कर्मचारी मन ले नगर पंचायत म लुका के बेरा के तियारी मन के जायजा लीन। संगेच जल आवर्धन योजना के संचालन के जानकारी लीन अउ नगर पंचायत क्षेत्र म स्थापित वाटर एटीएम के उपयोग बर आम जनता ल जागरूक करे के हुकुम दीन।
तहसील कार्यालय डोंगरगांव के जांच के बेरा म 5 कर्मचारी अनुपस्थित पाए गीस। जेमन ल कारण बताओ नोटिस जाारी करे गीस। तहसील डोंगरगांव स्थित लोक सेवा केन्द्र के मुआयना करे गीस। कार्यालय म उपस्थित गांव वाले मन ले चर्चा के समय ग्राम पंचायत दर्राबांधा के ग्रामीण श्री सकन ह बताइस कि ओखर बंटवारा के प्रकरण लंबित हे, त संभागायुक्त दुर्ग संभाग ह समयावधि म निराकरण करे के निर्देश तहसीलदार ल दीन। नायब तहसीलदार अशोक राजपूत के न्यायालय म 185 प्रकरण लंबित पाए गीस, श्री कावरे ह जोरदरहा नाराजगी व्यक्त करत प्रकरण मन के निराकरण म तेजी लाय के हुकुम दीन अउ उहां उपस्थित अनुविभागीय अधिकारी डोंगरगांव श्री हितेश पिस्दा ल समय-समय म तहसील कार्यालय के निरीक्षण अउ प्रकरण के अवलोकन करे के निर्देश दीन।
मोहला अउ अंबागढ चौकी म छात्रावास, चिकित्सालय अउ कार्यालय मन के तको उमन जांच करिन। जांच के समय श्री ललितादित्य नीलम, अनुविभागीय अधिकारी मोहला घलोक उपस्थित रहिन। शासकीय उच्चतर माध्यमिक शाला मोहला के निरीक्षण के समय उपस्थित छात्रा अउ शिक्षक मन ले चर्चा करे गीस संगेच एकलव्य आदर्श आवासीय विद्यालय अउ पोस्ट मैट्रिक आदिवासी कन्या छात्रावास मोहला म लइका मन ले भोजन व्यवस्था, साफ-सफाई अउ अध्यापन काम के संबंध म जानकारी लेहे गीस। श्री कावरे ह लइका मन ले जब पूछिन के बड़े होके का बनहू? त उहां उपस्थित बच्ची कुमारी सोनम किरगे ह जवाब दीस कि में कलेक्टर बनहूं। श्री कावरे ह सबो लइका मन ल मार्गदर्शन प्रदान करिन। मोहला स्थित ई-लायब्रेरी के निरीक्षण के समय श्री कावरे ह एला एक अच्छा पहल बताइन संगेच क्षेत्र के लइका मन ल प्रतियोगिता परीक्षा बर प्रेरित करे के निर्देश दीन।