सुशासन तिहार अंतर्गत विभाग मन म आए शासन स्तर के आवेदन मन के निराकरण बर पहल करे दीन निर्देश
मादक प्रदार्थ मन के रोकथाम बर जन-जागरूकता कार्यक्रम करव आयोजित
दुर्ग, संभाग आयुक्त श्री एस.एन. राठौर ह आज संभाग आयुक्त कार्यालय के सभा कक्ष म संभाग स्तरीय अधिकारी मन के बैठक म समय-सीमा प्रकरण मन के समीक्षा करिन अऊ अधिकारी मन ल जरूरी दिशा-निर्देश दीन। श्री राठौर ह सुशासन तिहार के समय आवेदन मन के गुणवत्तापूर्वक निराकरण म अधिकारी मन ल बधाई दीन। संगेच शासन स्तर के लंबित आवेदन मन के जल्दी निराकरण बर जरूरी पहल करत रहे के निर्देश दीन। उमन अधिकारी मन ले मादक पदार्थ के रोकथाम बर विभागीय कार्यवाही के जानकारी लीन। उमन शैक्षणिक संस्थान मन के आस-पास मादक पदार्थ मन के बिक्री उपर कड़ी नजर रखे अऊ मनखे मन म नशा के प्रवृत्ति के रोकथाम बर जन-जागरूकता अभियान चलाय के निर्देश दीन। संभाग आयुक्त ह उच्च शिक्षा अऊ स्कूल शिक्षा विभाग के अधिकारी मन ल संयुक्त कार्ययोजना बनाके एनसीसी, एनएसएस अउ स्काऊट गाईड के वि़द्यार्थी मन के नशा के खिलाफ जन-जागरूकता रैली सबो नगरीय निकाय म आयोजित करे ल कहिन। उमन अधिकारी मन ल नशा के आदी अऊ नशा के हालत म माहौल खराब करइया या अइसन हालत म कोनो प्रकार के गड़बड़ होए के संभावना होवय त गोपनीय तौर म जानकारी उपलब्ध कराए ल कहिन। ताकि अइसन मनखे के विरूद्ध समय म कड़ी कार्यवाही करे जा सकय।
संभाग आयुक्त ह संभाग के हरेक पंचायत म प्राथमिक सहकारी समिति के जानकारी लीन। उमन कहिन के मोहला-मानपुर-अंबागढ़ चौकी अऊ खैरागढ़-छुईखदान-गंडई जिला मन म जादा ले जादा दुग्ध समिति गठित करे जाए। संयुक्त आयुक्त सहकारिता ह अवगत कराइस के संभाग के 2444 पंचायत म ले 1349 पंचायत प्राथमिक सहकारी समिति मन ले कव्हर कर लेहे गए हे। लक्ष्य के मुताबिक साल 2026 तक सबो पंचायत ल कव्हर कर लेहे जाही। संभाग आयुक्त श्री राठौर ह अभी घलो कई ठन कार्यालय म शिक्षक मन ल अटैच करे म चिंता जाहिर करत ओ शिक्षक मन के सेवा संबंधित शाला ल सउंपे के तुरंत कार्यवाही करे ल संयुक्त संचालक शिक्षा ल निर्देश दीन। कहूं शिक्षक शाला म नइ लहुटहीं त कड़क अनुशासनात्मक कार्यवाही करे जाही। संभागायुक्त ह कहिन के कार्यालय मन म बेहतर काम व्यवस्था ठउका करे जाए, कार्यालयीन गतिविधि मन ले सुशासन झलकना चाही। बैठक म उपायुक्त (रा.) श्री पदुम यादव, संयुक्त आयुक्त सहकारिता श्री मुकेश ध्रुव, संयुक्त संचालक शिक्षा श्री आर.एल. ठाकुर, संयुक्त संचालक कोष अउ लेखा श्री राठौर संग जम्मो विभाग के संभाग स्तरीय अधिकारी उपस्थित रहिन।
संभाग आयुक्त ह लीन संभाग स्तरीय अधिकारी मन के समय-सीमा प्रकरण मन के समीक्षा बैठक
