- – उमन कहिन के अइसनहे ग्रामीण विकास के बड़का योजना मन ले बदलही ग्रामीण क्षेत्र के तस्वीर
- – ठकुराइनटोला म सोलर प्रोजेक्ट घलोक देखिन, नकटा तालाब के सौंदर्यीकरण काम देखिन, कहिन कैचमेंट एरिया झन होवय प्रभावित एकर विशेष रखव ध्यान
दुर्ग, 14 अगस्त 2020। करीबन दू महीना म भाठागांव म बीस एकड़ म लगाए गए मुनगा के साढ़े छै हजार पौधा मन अब बढि़या बाढ़त हें। ये प्लांटेशन ल आज संभागायुक्त श्री टीसी महावर ह देखिन। उमन कहिन के कई मायने म ये काम बहुत महत्वपूर्ण हे। ये मा कई पहलु सामिल हे। जइसे मुनगा प्लांटेशन के माध्यम ले पौधरोपण के बड़का काम होए हे। मुनगा कुपोषण ले लड़े म घलव बड़का माध्यम साबित होथे। एखर अलावा आजकल औषधीय उपयोग बर घलोक मुनगा के बड़का भूमिका आगू आए हे। ए बेरा म कलेक्टर डॉ. सर्वेश्वर नरेन्द्र भुरे ह बताइस के मनरेगा के माध्यम ले ये प्लांटेशन के काम करे गए हे। ड्रिप इरीगेशन अऊ बोर के सुविधा बर डीएमएफ ले पंद्रा लाख रुपए देहे गए हे। ये प्रकार से केवल दू महीना म ही ये तियार हो गए हे। मुनगा के पौधा के उत्तरजीविता कम रहिथे फेर इहां पौधा मन पनपत हें। कलेक्टर ह बताइस के ये मा स्वसहायता समूह घलोक जुड़े हे। उद्यानिकी विभाग कोति ले ए मन ल सब्जी रोपण के संबंध म तकनीकी जानकारी अऊ मार्गदर्शन देहे जात हे। एखर माध्यम ले एक पूरा लाइन म बरबट्टी, करेला अऊ आन सब्जी लगाए जात हे। एखर अलावा गोंदा जइसे फूल मन के रोपण घलोक करे गए हे।
मरीन ड्राइव के तर्ज म बनाए जात हे नकटा तालाब- संभागायुक्त ह नकटा तालाब के सौंदर्यीकरण के काम घलोक देखिन। करीबन पांच करोड़ 26 लाख रुपए के लागत ले एखर सौंदर्यीकरण के काम करे जात हे। सौंदर्यीकरण के मैप संभागायुक्त ह देखिन। इंजीनियर मन ह बताइन के एकर लैंडस्केप रायपुर के मरीन ड्राइव के जइसे सुंदर होही। अइसनहे हनुमान तालाब के सौंदर्यीकरण के काम घलोक करे जात हे। संभागायुक्त ह कहिन के तालाब मन के संरक्षण म ये बात के ध्यान रखव के ओखर कैचमेंट एरिया प्रभावित झन होवय। ये म इंजीनियर मन ह कहिन के सौंदर्यीकरण के काम ये प्रकार होवत हे के एखर से तालाब के कैचमेंट एरिया बाढ़ही। मूलतः सौंदर्यीकरण अऊ विरासत के संरक्षण के दिशा म काम होवत हे। संभागायुक्त ह कहिन के नकटा तालाब पाटन के सबले जुन्ना तालाब मन म ले हे। ये बहुत अच्छा पहल हे के हम अपन धरोहर मन ल अइसनहे संरक्षित रखे के दिशा म अऊ ओ मन ल जादा उपयोगी बनाए के दिशा म काम करत हन।
मोहल्ला कक्षा मन ल घलोक देखिन- संभागायुक्त अऊ कलेक्टर ह ग्राम बटंग म चलत मोहल्ला कक्षा मन घलोक देखिन। अधिकारी मन ह बताइन के पूरा सैनिटाइजेशन करे के बाद अऊ सोशल डिस्टेंसिंग के खास ध्यान रखके ग्रामीण क्षेत्र मन म सामुदायिक भवन मन म पाठ पढ़ाये जात हे। संभागायु्क्त घलोक शिक्षक के भूमिका म नजर आइन। उमन लइका मन ले गणित के अऊ सामान्य ज्ञान के सवाल पूछिन। लइका मन ह मुख्यमंत्री के नाम अऊ जिला ले संबंधित आन महत्वपूर्ण तथ्य मन के सही-सही उत्तर दीन।
ठकुराइनटोला म देखिन सोलर प्रोजेक्ट- संभागायुक्त ह ठकुराइनटोला म सोलर प्रोजेक्ट देखिन। ये ह बिल्कुल खारून नदी ले लगके बनाए जात हे। करीबन डेढ़ करोड़ रुपए के ये प्रोजेक्ट ले 75 एकड़ खेत मन म सिंचाई हो सकही अऊ एकर से करीबन 46 किसान परिवार लाभान्वित होही। संभागायुक्त ह गैरपरंपरागत ऊर्जा ल बढ़ावा देहे के उपाय मन ल सहराइन।
