मुख्यमंत्री ह दीस बधाई अऊ शुभकामना
ज्ञानेश्वरी ल आगू के तैयारी बर 5 लाख रूपिया के आर्थिक मदद अऊ एएसआई के पद म नौकरी देहे के घोषणा
रायपुर, मुख्यमंत्री श्री भूपेश बघेल ह ग्रीस म आयोजित आईडब्ल्यूएफ जूनियर वर्ल्ड वेटलिफ्टिंग चैंपियनशिप म तीन रजत पदक जीतइया छत्तीसगढ़ के बेटी ज्ञानेश्वरी यादव ल आगू के तैयारी बर पांच लाख रूपिया के आर्थिक सहायता अऊ छत्तीसगढ़ पुलिस म सहायक उपनिरीक्षक के पद म नियुक्ति देहे के घोषणा करे हें। मुख्यमंत्री ह ये मौका म ज्ञानेश्वरी यादव के कोच श्री अजय लोहार ल घलोक 5 लाख रूपिया के आर्थिक सहायता देहे के घोषणा करिन।
राजनांदगांव निवासी ज्ञानेश्वरी यादव ह आज मुख्यमंत्री श्री बघेल ले ऊंखर रायपुर स्थित निवास कार्यालय म मुलाकात करके ओ मन ल अपन उपलब्धि के जानकारी दीन। मुख्यमंत्री ह ज्ञानेश्वरी ल ये अंतर्राष्ट्रीय स्पर्धा म शानदार प्रदर्शन करत तीन रजत पदक जीते म बधाई अऊ शुभकामना देवत ऊंखर उज्ज्वल भविष्य के कामना करिन। श्री बघेल ह कहिन कि ज्ञानेश्वरी ह अपन उपलब्धि ले पूरा छत्तीसगढ़ ल गौरवान्वित करे हे। मुख्यमंत्री ह ज्ञानेश्वरी यादव, ऊंखर कोच श्री अजय लोहार, ज्ञानेश्वरी के पिता श्री दीपक यादव ल शाल अऊ स्मृति चिन्ह प्रदान कर सम्मानित करिन।
ग्रीस के हेराक्लिओन शहर म 01 ले 10 मई तक आयोजित जूनियर वर्ल्ड वेटलिफ्टिंग चैंपियनशिप म ज्ञानेश्वरी ह 49 किलोग्राम वर्ग के स्नेच, क्लीन एंड जर्क स्पर्धा म रजत पदक जीते हे। मुख्यमंत्री ले मुलाकात के समय दिग्विजय स्टेडियम राजनांदगांव के मैनेजर श्री रणविजय प्रताप सिंह घलोक उपस्थित रहिन।
