बोरवेल म फंसे लइका के रेस्क्यू ऑपरेशन उपर बनही डाक्यूमेंटरी फिल्म

रायपुर, मुख्यमंत्री श्री भूपेश बघेल ह कहिन हे कि जांजगीर-चांपा जिला के बोरवेल म फंसे लइका ल निकाले बर चलाए गए रेस्क्यू ऑपरेशन उपर डाक्यूमेंटरी फिल्म बनना चाही। रेस्क्यू टीम के ये अनुभव ल प्रदेश अऊ देश के मनखे समझ सकयं। ये फिल्म भविष्य म अइसन होवइया घटना ल रोके बर घलोक सीख बनही। मुख्यमंत्री श्री बघेल आज इहां अपन निवास कार्यालय म जांजगीर-चांपा जिला के ग्राम पिहरीद के बोरवेल म फंसे लइका के रेस्क्यू ऑपरेशन म उल्लेखनीय भूमिका अदा करइया जिला प्रशासन, एनडीआरएफ अऊ एसडीआरएफ, सेना अऊ पुलिस के जवान मन संग ये आपरेशन म सहयोग देवइया मनखे मन के सम्मान समारोह ल सम्बोधित करत रहिन।
मुख्यमंत्री ह रेस्क्यू टीम ल करिस सम्मानित
मुख्यमंत्री श्री भूपेश बघेल ह कहिन कि राहुल के पढ़ई, लिखई अऊ ओखर चिकित्सा के पूरा खरचा राज्य शासन कोति ले वहन करे जाही। मैं पूरा रेस्क्यू टीम अऊ प्रदेश अऊ देश के जनता के प्रति कृतज्ञता व्यक्त करत हंव, जे मन राहुल के जल्‍दी रेस्क्यू बर दुआ करिन। आप सबो के सूझबूझ, मेहनत, लगन अऊ हौसला ह काम करिस। सबो के लक्ष्य एके रहिस, राहुल ल बचाना अऊ वो पूरा होइस। उमन कहिन कि ये ऑपरेशन दुरूह रहिस, संकट आइस, संघर्ष आइस, फेर हिम्मत बने रहिस। ये पूरा घटनाक्रम के डॉक्यूमेंट्री बनना चाही ताकि मनखे एला देखयं, समझयं जेखर से भविष्य म अइसन घटना ल टाले जा सकय। आप सबो के सम्मान करके मन नइ भरे हे, आप मन ल अऊ सम्मानित करे के मन करत हे। लइका राहुल साहू ल बोरवेल ले निकालइया बालक अजरूल अऊ पूरा टीम ल राज्योत्सव म आमंत्रित करे जाही अऊ उहां आप सबो के सम्मान होही।
मुख्यमंत्री ह कहिन कि उलट परिस्थिति मन म घलोक आप मन डटे रहेव, कड़क धूप म, खुला मैदान म लगातार संघर्ष करत रहेव। ईश्वर ह राहुल म कुछ कमी कर देहे हे, फेर दुसर कोति कुछ खासियत घलोक देहे हे। राहुल के हिम्मत अऊ संतोष ह बहुत बड़ काम करिस। राहुल के पढ़ई लिखाई अऊ इलाज के पूरा खरचा राज्य सरकार वहन करही। स्पीच थेरेपी, श्रवण यंत्र लगवाए के जरूरत होही तो ओखर खरचा घलोक राज्य सरकार उठायेही। मैं रेस्क्यू ऑपरेशन के पूरा टीम ल बधाई देवत हंव।