नारायणपुर, 09 अप्रैल 2020। पूरा देश कोराना वायरस ल खतम करे बर अपन-अपन तरीका ले सहयोग करत हे। उहें आकांक्षी जिला म सामिल नक्सल प्रभावित नारायणपुर जिला के सरकारी, गैरसरकारी कर्मचारी, कामकाजी महिला मन के संग स्वसहायता समूह के महिला म न तो आगू रहिबे करे हें, फेर अब घरेलू महिला मन तको आगू आवत हें। कलेक्टर श्री पी.एस. एल्मा ल आज कलेक्टोरेट म मांझीपारा के सुश्री मुक्ता अऊ भारती नाग ह अपन घरेलू बचत ले 21,850 रूपिया के नकद राशि मुख्यमंत्री सहायता कोष बर सौंपिन। कलेक्टर श्री एल्मा ह ऊंखर ये सहयोग के जमके प्रसन्नता व्यक्त करिन। अब तक मुख्यमंत्री सहायता कोष म चार लाख ले जादा राशि के चेक मिले हे। जेला मुख्यमंत्री सहायता कोष म जमा करे गए हे।
नगरीय अऊ ग्रामीण ईलाका के कुछ घरेलू महिला मन जरूरतमंद मन ल रियूजेबल मास्क बनाके मुफ्त म बांटत घलव हें। कलेक्टर ह हाले म दीनदयाल कॉलोनी के घरेलू महिला मन अऊ समूह के ग्रामीण महिला मन जऊन रियूजेबल मास्क अउ रोज़ काम अवइया चीज साबुन आदि बनावत हें उंखर मन से कहिन के ओ मन एला बनाके जिला पंचायत नारायणपुर ल देवव। मास्क अऊ दूसर चीज मन के वाजिब भुगतान घलोक करे जाही। कलेक्टर ह महिला सफाई कर्मी मन के घलोक तारीफ करिन जऊन रोज भिनसरहा डोर-टू-डोर कचरा लेके ओमां ले मास्क आदि हानिकारण चीज मन ल उचित ढंग ले नष्ट करे म अपन महती भूमिका निभावत हें। उमन स्वास्थ्य अमला के संगेच वो महिला अधिकारी-कर्मचारी मन के काम के सराहना करिन जऊन होम आईसोलेशन म रखे मनखे के नियमित स्वास्थ्य परीक्षण अऊ लगातार नजर बनाये रखे हें।
