- दान ले मिले राशि ले बड़ पैमाना म हाईजिनिक लंच पैकेट तियार करके जरूरतमंद मन म बांटे जाही
- वालंटियर मन बांटहीं, एखर से मनखे मन ल घर ले बाहिर जाय के खतरा घलोक नइ उठाना परही अऊ सेवा के अवसर घलोक मिलही
- नवरात्रि पर्व म बहुत अकन श्रद्धालू कन्या भोजन कराथें। लॉकडाउन के चलत ये म दिक्कत होही त बेरा म दान राशि ले बहुत अकन परिवार के कन्या मन ल घलोक मिल सकही भोजन
दुर्ग, 27 मार्च 2020। पूरा संसार म कोरोना वायरस के छाए आपदा ल देखत जिला प्रशासन ह सेवाभावी संगठन अऊ नागरिक मन ले नागरिक पोषण, सुरक्षा बर मुक्त हस्त ले संकट म फंसे मनखे मन के मदद करे के अपील करे हें। एखर बर सेवा भावी नागरिक/संस्था/संगठन घर म सुरक्षित रहत घलोक मनखे मन के मदद कर सकत हें। नागरिक/संस्था/संगठन कोति ले दान करे गए सहयोग राशि ले मनखे मन बर लंच पैकेट तियार कराए जाही। ये पैकेट पूरा हाईजिनिक होही अऊ एकर वितरण म संक्रमण ले रोकथाम के विशेष उपाय मन के व्यवस्था होही। एखर बर जिला प्रशासन ह वालंटियर्स तियार कर लेहे हे। काबर कि जिला प्रशासन कोति ले अइसन आपदा ग्रस्त मनखे मन के चिन्हारी करे जात हे। ए खातिर आप मन कोति ले देहे गए सहयोग राशि के लाभ सीधा जरूरतमंद मन तक पहुंच सकही। सेवाभावी संस्था/नागरिक मन कोति ले चिन्हारी करे जगा मन म घलोक उंखर सहयोग राशि ले जरूरतमंद मन ल लंच पैकेट पहुंचाए जा सकही।
अभी हाल म नवरात्रि पर्व घलोक चलत हे। बहुत अकन परिवार म ये बेरा म कन्या भोजन कराए के परंपरा हे। अइसन दान-दाता मन कोति ले देहे गए दान राशि ले बहुत अकन परिवार के कन्या मन तक भोजन सुरक्षित तरीका ले पहुंच सकही। जिला प्रशासन कोति ले अलग से एखर बर बैक खाता घलोक खोले जात हे। संगेच कई जगा जइसे नगर निगम कार्यालय दुर्ग, भिलाई, रिसाली अउ भिलाई चरोदा म एखर से संबंधित काउंटर्स घलोक खोले जात हे। ये बैंक खाता या संबंधित काउंटर्स म दान दाता राशि जमा करा सकहीं। ए संबंध म कोनो प्रकार के पहल बर जिला कार्यक्रम अधिकारी श्री विपिन जैन के मोबाइल नंबर 6262470000 म संपर्क करे जा सकत हे।
