- अभियान म दानदाता मन के सहयोग ले जरूरतमंद परिवार तक पहुंचाए जाही राशन
- राशन के पैकेट सकेले मोहल्ला अऊ कालोनी मन म भेजे जाही वाहन
- लॉकडाउन म जरूरतमंद मन के सहायता बर जिला प्रशासन के सराहनीय पहल: श्री भूपेश बघेल
- जरूरतमंद मन के सहायता बर मुख्यमंत्री ह खुदे राशन के 500 पैकेट अऊ 11 हजार रूपिया के सहायता राशि दीन
रायपुर 07 अपरेल 2020। कोरोना के रोकथाम बर लागू लॉक डाउन के सेती दैनिक रोजी-मजदूरी करके जीवन यापन करइया परिवार मन ल राहत पहुंचाए बर रायपुर जिला प्रशासन कोति ले राशन प्रदान करे जात हे। जरूरतमंद मन के सहायता के इच्छुक दानदाता राशन के पैकेट तियार करके ओला जिला प्रशासन ल उपलब्ध करा सकत हे। जिला प्रशासन ह ए राशन के पैकेट ल सकेले बर डोनेशन ऑन व्हील्स अभियान चालू करे हे। मुख्यमंत्री श्री भूपेश बघेल ह आज इहां अपन निवास परिसर ले ये अभियान के शुभारंभ करिन। मुख्यमंत्री ह खुद जरूरतमंद मन के सहायता बर राशन सामान के 500 पैकेट अऊ 11 हजार रूपिया के सहायता राशि जिला प्रशासन ल सौंपिन।
मुख्यमंत्री ह जिला प्रशासन कोति ले करे गए ये पहल के सराहना करिन। रायपुर कलेक्टर डॉ. एस. भारतीदासन, वरिष्ठ पुलिस अधीक्षक श्री आरिफ शेख, जिला पंचायत रायपुर के सीईओ डॉ. गौरव कुमार सिंह ये बेरा म उपस्थित रहिन। डोनेशन ऑन व्हील्स अभियान के तहत कई कालोनी, व्यावसायिक परिसर मन म जिला प्रशासन के विशेष वाहन पहुंचके मनखे मन ले राशन पैकेट सकेलही। दानदाता 5 किलोग्राम चावल, 2 किलोग्राम आटा, आधा किलोग्राम दाल, आधा किलोग्राम नमक अउ एक नग साबुन के राशन पैकेट तियार कर सकत हे। सहयोग करे इच्छुक संस्था, व्यवसायिक परिसर अउ कॉलोनी के निवासी मन ये सुविधा के लाभ उठाए बर जिला पंचायत के मुख्य कार्यपालन अधिकारी डॉ. गौरव कुमार सिंह के दूरभाष क्रमांक- 9669577888 या रायपुर स्मार्ट सिटी के महाप्रबंधक (जनसपंर्क) श्री आशीष मिश्रा के दूरभाष क्रमांक- 9685792100 म संपर्क करके बोठ-बात कर सकत हें। जानबा होए हे के जिला प्रशासन कोति ले ये अभियान के तहत छै वाहन शहर म चलाए जाही।
