अइसे एप डाउनलोड करे ले बचव, स्टॉल करत ही जज के पत्नी के खाता ले निकालिस 24 हजार रुपिया

रायपुर, 4 नवम्बर 2020। प्रधानमंत्री मातृत्व योजना के तहत पैसा देहे के झांसा देके एक जज के पत्नी ले ऑनलाइन ठगी होगे। फोन हैक करके खाता ले 3 किश्त म 24 हजार रुपिया निकाल लीस। जबकि वो अपन निजी जानकारी कोनों ल शेयर नई करे रिहिस। सिर्फ एक एप डाउनलोड करे रिहिस। ओतने म ही उंखर खाता ले पैसा पार होगे। कोतवाली पुलिस ह बताइस की पुलिस लाइन म रहवइया रिंकल लालवानी क्षत्री के पति राहुल क्षत्री एमपी विदिशा म न्यायिक मजिस्ट्रेट हे। सोमवार के एक कॉल आइस। कॉल करइया बताइस कि विदिशा के आंगनबाड़ी कार्यकर्ता ले नंबर मिले हे। खाता म प्रधानमंत्री मातृत्व योजना के तहत 5000 रुपए जमा कराना हे। जेखर सत्यापन बर कॉल करे गेहे। ठग ह कहिन कि क्विक सपोर्ट एप डाउनलोड करव। अऊ झांसा म आके एप डाउनलोड कर दीन। ठग के बताए अनुसार प्रोसेस ल करिन। ओखर बाद तीन किश्त म खाते ले 24 हजार रुपए निकाल लेहे गीस। ट्रांजेक्शन के रिंकल के मोबाइल म मैसेज आइस। अउ मैसेज देख के हड़बड़ा गीस। अपन पति ल एखर जानकारी दीन। ओखर बाद कोतवाली थाना म रिपोर्ट लिखइन। रिंकल ह अपन खाता ब्लॉक करा लेहे हे। बैंक ले घलो ट्रांजेक्शन के जानकारी मांगीस हे। सायबर सेल के टीम एखर जांच करत हे। पुलिस के अनुसार क्विक सपोर्ट एप ले फोन हैक होगे। फोन म जोन मैसेज आइस ओखर ले ठग ह पैसा के ट्रांजेक्शन कर लीस। अइसे एप डाउनलोड करे ले बचव पुलिस ह लोगन मन ले अपील करे हे कि क्विक सपोर्ट एप डाउनलोड करे ले बचव। काबर की ठग ये एप के माध्यम ले फोन ल हैक करत हे। फोन म आए ओटीपी के जानकारी लेके खाता म सेंध लगावत हे।