- तौल मशीन म पाइन गड़बड़ी- तुरंते बदले के निर्देश
- कलेक्टर के निर्देश म बदले गीस मशीन
जगदलपुर, कलेक्टर डॉ. अय्याज तम्बोली ह काली तोकापाल विकासखण्ड के बड़ेमारेगा अऊ तोकापाल धान खरीदी केन्द्र मन के उदुपहा जांच करिन। उमन खरीदी केन्द्र मन म इलेक्ट्रॉनिक तौल मशीन मन के जांच करिन। कलेक्टर ह जांच म पाइस कि बड़ेमारेंगा खरीदी केन्द्र म इलेक्ट्रॉनिक तौल मशीन बने सहिन काम नइ करत हे, एखर बर उमन लैम्पस प्रभारी ल तुरंते मशीन ठीक कराए के निर्देश दीन। कलेक्टर ह कहिन कि धान खरीदी म कोनो प्रकार के गड़बड़ी बर्दाश्त नइ करे जाए। उमन किसान मन ले घलोक कहिन कि ओ मन अपन आगू धान के तौल करावंय। कलेक्टर के निर्देश म आज खरीदी केन्द्र म इलेक्ट्रॉनिक तौल मशीन बदले गीस।
कलेक्टर ह खरीदी केन्द्र मन म गिरदावरी रिपोट अऊ खसरा के घलोक अवलोकन करिन। गिरदावरी रिपोट के मुताबिक किसान मन ल धान बेचे बर टोकन जारी करे के निर्देश दीन। उमन खरीदी केन्द्र प्रभारी ले कहिन कि किसान मन ल धान बेचे म कोनो प्रकार के दिक्कत नइ होना चाही। खरीदी केन्द्र मन म पर्याप्त बारदाना, प्रकाश अऊ पेयजल के व्यवस्था करे के निर्देश दीन। उमन मार्कफेड के अधिकारी मन ल धान संग्रहण केन्द्र मन म बोरी मन के स्टेकिंग (लॉट) निरधारित मानक के मुताबिक करे के निर्देश दीन। उमन अधिकारी मन ले कहिन कि एक लाट म निरधारित मानक अनुसार 4500 बोरा होना चाही। निरीक्षण के समय जिला पंचायत के मुख्य कार्यपालन अधिकारी श्री इन्द्रजीत चन्द्रवाल घलोक ऊंखर संग रहिन।
