खूबचंद बघेल स्वास्थ्य सहायता योजना : जानव कइसे मिलही फायदा

छत्तीसगढ़ सरकार ह अपन प्रदेश के जनता ल बेहतर उपचार सुविधा प्रदान करे बर राज्य म डॉक्टर खूबचंद बघेल स्वास्थ्य सहायता योजना अऊ मुख्यमंत्री विशेष स्वास्थ्य सहायता योजना के शुरुआत करे के फैसला करे हे। राज्य के बड़का अधिकारी मन के बताती छत्तीसगढ़ सरकार ह राज्य के सबो नागरिक मन ल बेहतर अऊ गुणवत्तापूर्ण उपचार सुविधा प्रदान करे बर मुख्यमंत्री भूपेश बघेल के अध्यक्षता म काली होए मंत्रिपरिषद के बैठक म दू नवा स्वास्थ्य योजना डॉक्टर खूबचंद बघेल स्वास्थ्य सहायता योजना अउ मुख्यमंत्री विशेष स्वास्थ्य सहायता योजना शुरू करे के फैसला करे हे।
साहब मन के बताती खूबचंद बघेल स्वास्थ्य सहायता योजना के तहत आयुष्मान भारत प्रधानमंत्री जन आरोग्य योजना म सामिल परिवार के संगेच नवा योजना के मुताबिक सबो प्राथमिक अऊ अंत्योदय राशन कार्डधारी परिवार मन ल पांच लाख रूपिया तक स्वास्थ्य बीमा सुविधा मिलही। प्रदेश म अइसन करीबन 56 लाख परिवार हे। आन राशन कार्डधारी परिवार मन ल 50 हजार रूपिया तक इलाज के सुविधा मिलही। ए योजना के अंतर्गत राज्य म प्रचलित आन स्वास्थ्य सुविधा उपलब्‍ध कराए वाले जम्‍मो योजना मन आयुष्मान भारत प्रधानमंत्री जन आरोग्य योजना, मुख्यमंत्री स्वास्थ्य बीमा योजना, मुख्यमंत्री बाल हृदय सुरक्षा योजना, मुख्यमंत्री बाल श्रवण योजना अऊ राष्ट्रीय बाल स्वास्थ्य कार्यक्रम (चिरायु) योजना ए नवा योजना म संघर जाही। ए नवा योजना के अंतर्गत राज्य के सबो राशन कार्डधारी परिवार मन ल स्वास्थ लाभ मिलही।
ए योजना के क्रियान्वयन संचालनालय स्वास्थ सेवाएं के अंतर्गत स्थापित राज्य नोडल एजेंसी कोति ले ट्रस्ट मॉडल म करे जाही। मने राज्य क्रियान्वयन अऊ सुविधा बर भुगतानकर्ता के रूप म काम करही। अधिकारी मन ह बताइस कि मंत्रिमंडल के बैठक म संजीवनी सहायता कोष के विस्तार करत दुर्लभ बीमारी मन बर मुख्यमंत्री विशेष स्वास्थ्य सहायता योजना चालू करे के निर्णय ले गए हे। ये मा प्रकरण के मुताबिक अऊ मुख्यमंत्री के अनुमोदन के बाद जादा ले जादा 20 लाख रूपिया तक के इलाज के सुविधा देहे जाही।