रायपुर, 09 फरवरी 2020। स्वत्रंतता संग्राम सेनानी अऊ पद्मश्री सम्मान ले सम्मानित स्वर्गीय डॉ. महादेव प्रसाद पांडेय ल आज राजधानी रायपुर के मारवाड़ी श्मशान घाट म पूरा राजकीय सम्मान के संग आखरी विदाई दिए गीस। मुख्यमंत्री श्री भूपेश बघेल ह मारवाड़ी श्मशान घाट पहुंचके ओ मन ल विनम्र श्रद्धांजलि अर्पित करिन।
ये बेरा म आयोजित श्रद्धांजलि सभा म मुख्यमंत्री श्री भूपेश बघेल ह कहिन कि आज भारत माता ह अपन एक महान सपूत ल गंवा दीस। डॉ पाण्डेय अजातशत्रु रहिन। ओ मन राष्ट्रीय आंदोलन ले बचपन ले ही जुड़े रहिन अऊ लइकई ले ही ओ मन ल जेल के यात्रा करना परिस। श्री बघेल ह कहिन कि ओखर निधन पूरा राज्य, देश अऊ ऊंखर खुद बर व्यक्तिगत क्षति हे।
श्री बघेल ह कहिन कि स्वर्गीय श्री महादेव प्रसाद पाण्डेय आखरी समय तक सक्रिय रहिन। उमन कहिन कि जब महात्मा गांधी के 150वां जयंती के अवसर म विधानसभा के विशेष सत्र आयोजित करे गए रहिस, तब कार्यक्रम म सामिल होए बर ओ मन व्हील चेयर म आए रहिन। उंखर शरीर भले संग नइ देवत रहिस फेर मन म ऊंखर उत्साह म कोनो कमी नइ रहिस। श्री बघेल ह कहिन कि डॉ पाण्डेय ऊंखर पाटन क्षेत्र के निवासी रहिन अऊ उंखर डॉ महादेव प्रसाद पांडे के संग आत्मीय लगाव रहिस। जब उंखर से मुलाकात होत रहिस, उंखर भरपूर स्नेह अऊ मार्गदर्शन मिलत रहिस। मुख्यमंत्री ह कहिन कि जब ओ मन बीमार रहिन, त रामकृष्ण अस्पताल जाके उंखर से मुलाकात करे रहिन। तब डॉ महादेव प्रसाद पांडे ह कहे रहिन कि में बीमार रहेंव, अब ठीक हो गएंव हंव जल्दीच मोला अस्पताल ले डिस्चार्ज कर दे जाही। मुख्यमंत्री ह कहिन कि डॉ. महादेव प्रसाद पाण्डेय ह स्वतन्त्रता संग्राम म उल्लेखनीय योगदान देहे हें। ओ मन आखरी समय तक सार्वजानिक जीवन म सक्रिय रहिन। राष्ट्रीय पर्व अऊ महत्वपूर्ण आयोजन मन म ओ मन विशेष रूप ले उपस्थित रहत रहिन। श्री बघेल ह उहां स्वर्गीय डॉ. पाण्डेय के शोक संतप्त परिवारजन ले मुलाकात करके संवेदना प्रकट करिन अऊ ओ मन ल ढांढस बंधाइन।