- प्रभारी मंत्री सामिल होइन जिला स्तरीय शाला प्रवेश उत्सव म
- नवप्रवेशी छात्र-छात्रा मन के तिलक लगाके, मुंह मीठा कराके अऊ फूलमाला पहिनाके करिस स्वागत
बालोद, प्रदेश के स्कूल शिक्षा, अनुसूचित जाति, जनजाति, आन पिछड़ा वर्ग अऊ अल्पसंख्यक कल्याण, सहकारिता मंत्री अऊ जिला के प्रभारी मंत्री डॉ. प्रेमसाय सिंह टेकाम के मुख्य आतिथ्य म आज जिला स्तरीय शाला प्रवेश उत्सव के आयोजन डौण्डीलोहारा विकासखण्ड के ग्राम दुधली के शासकीय उच्चतर माध्यमिक विद्यालय परिसर म होइस। ये बेरा म नवप्रवेशी छात्र-छात्रा मन के तिलक लगाके, मुंह मीठा कराके अऊ फूलमाला पहिनाके स्वागत करिन। प्रभारी मंत्री डॉ. टेकाम, बालोद विधायक श्रीमती संगीता सिन्हा, गुण्डरदेही विधायक श्री कुंवर सिंह निषाद, जिला पंचायत उपाध्यक्ष श्री संजय चन्द्राकर, जनपद अध्यक्ष डौण्डीलोहारा श्रीमती चन्द्रप्रभा सुधाकर संग आन अतिथिगण मन अऊ कलेक्टर श्रीमती रानू साहू ह नवप्रवेशी छात्र-छात्रा मन ल निःशुल्क पाठ्यपुस्तक अऊ गणवेश प्रदान करके ओ मन ल उज्जवल भविष्य के शुभकामना दीन। सरस्वती सायकल योजना के अंतर्गत कक्षा नवमी के तीन छात्रा मन ल निःशुल्क सायकल प्रदान करे गीस।
प्रभारी मंत्री डॉ. टेकाम ह छात्र-छात्रा मन ल संबोधित करत कहिन कि लक्ष्य निरधारित करके पढ़ाई करे ले सफलता जरूर मिलथे। लक्ष्य हासिल करे बर लगन अऊ मेहनत ले पढ़ाई करना जरूरी हे। उमन कहिन कि पढ़ाई के संग खेल जरूरी हे। शारीरिक, मानसिक स्वास्थ्य बर खेल जरूरी हे। उमन कहिन कि राज्य शासन कोति ले शिक्षा ल बने बनाए बर लगातार उदीम करे जात हे, जेखर तहत प्रदेश म पन्द्रा हजार नवा शिक्षक मन के भर्ती प्रक्रिया जारी हे। जहॉ-जहॉ शिक्षक मनके कमी हे उहॉ पूरा करे जाही।
प्रभारी मंत्री ह क्षेत्र के जनता के मॉग म ग्राम दुधली के हायर सेकेण्डरी स्कूल म अहाता निर्माण, हायर सेकेण्डरी स्कूल निपानी अऊ गुजरा म अकतहा कक्ष, गुण्डरदेही विकासखण्ड के ग्राम कचांदुर म दिव्यांग स्कूल आदि के घोषणा करिन। समारोह ल बालोद विधायक श्रीमती संगीता सिन्हा, गुण्डरदेही विधायक श्री कुंवर सिंह निषाद अऊ जिला पंचायत उपाध्यक्ष श्री संजय चन्द्राकर ह घलोक संबोधित करिन।
कलेक्टर श्रीमती रानू साहू ह स्वागत भाषण म कहिन कि शिक्षा एक अमूल्य धरोहर हे। शिक्षा समाज के विकास के आधार हे। लइका मन ल शिक्षा के प्रति जागरूक करे शाला प्रवेश उत्सव मनाया जावत हे। उमन जिला म संचालित स्कूल अऊ अध्ययनरत छात्र-छात्रा मन के जानकारी संग शिक्षा, खेलकूद अऊ सांस्कृतिक गतिविधि मन म जिला के उपलब्धि मन के जानकारी दीन। आभार प्रदर्शन जिला शिक्षा अधिकारी ह करिस। ये बेरा म पूर्व विधायक श्री डोमेन्द्र भेंडि़या, गणमान्य नागरिक श्री कृष्णा दुबे, श्री अनिल लोढ़ा, श्री पीयूष सोनी, श्री हस्तीमल सांकला, दुधली के सरपंच श्री फिरोज तिगाला संग अड़बड़ झन म छात्र-छात्रा, शिक्षक अऊ ग्रामीण उपस्थित रहिन।
