मिनिस्ट्री ऑफ ट्रायबल, भारत सरकार के तरफ ले नेशनल फैलोशिप बर होइस चयन
दुर्ग, 31 मई 2020। छत्तीसगढ़ कामधेनु विश्वविद्यालय अंतर्गत संचालित पशुचिकित्सा अउ पशुपालन महाविद्यालय अंजोरा, दुर्ग के पीएच.डी. अध्ययनरत् छात्रा रश्मि एस. कश्यप ल मिनिस्ट्री ऑफ ट्रायबल, भारत सरकार के तरफ ले नेशनल फैलोशिप (कैटेगरी-एस.टी.) बर चयन करे गए हे। डॉ. रश्मि एस. कश्यप महाविद्यालय के मेडिसीन विभाग म पी.एच.डी. पहिली साल के छात्रा ये। प्रदेश ले डॉ.रश्मि एकमात्र छात्रा हे जेकर चयन ये राष्ट्रीय स्तर के स्कालरशिप बर होय हे। ओ ह पशु औषधि के क्षेत्र म शोध करही जेखर से प्रदेश के दुरांचल म स्थित किसान अउ पशुपालक लाभान्वित होही। जानबा होए हे के केन्द्र शासन कोति ले प्रतिभाशाली छात्रा मन के राष्ट्रीय स्तर म चयन करे जाथे जेखर से आदिवासी छात्र मन ल उच्च शिक्षा बर प्रेरित करे जा सकय। विश्वविद्यालय के कुलपति डॉ.एन.पी.दक्षिणकर, अधिष्ठाता डॉ.एस.के.तिवारी अउ कुलसचिव डॉ.पी.के.मरकाम ह डॉ.रश्मि के अभिनंदन करिन अउ ओखर उज्ज्वल भविष्य बर शुभकामना दीन।