खेत मन म जाके किसानी अउ फसल मन के हालात के लीन जायजा
मैदानी अधिकारी मन ल किसान मन के सम्पर्क म रहे के दीन निर्देश
बिलासपुर, कमिश्नर डॉ.संजय अलंग ह आज कलेक्टर सौरभकुमार के संग मस्तुरी विकासखण्ड के आधा दर्जन गांव मन के दौरा करके फसल अउ खेती-किसानी के ताजा हालात के जायजा लीन। उमन गांव वाले अउ किसान मन के संग खेत म पहुंचके फसल अउ किसानी काम मन के अवलोकन करिन। किसान मन अउ कृषि मजदूर मन ले बातचीत घलोक करिन। उमन बताइन कि पाछू दू-तीन दिन म अंचल म बारिश होए ले बंद परे किसानी काम फेर शुरू होए हे। तभो ले गांव मन म उपरी क्षेत्र म पानी के कमी के सेती खेत सूखाए शुरू हो गे हे।
कमिश्नर ह आज मस्तुरी के ग्राम पेण्डरी, रिस्दा, हिर्री, देवगांव, खुड़ूभांठा अऊ पाराघाट संग बहुत अकन गांव मन के सघन दौरा करिन। उमन राजस्व अउ कृषि विभाग के मैदानी अधिकारी मन ल अल्प वर्षा वाले क्षेत्र मन के हर रोज दौरा करके किसान मन ल हरसंभव सहयोग करे ल कहिन। राज्य शासन के मंशा के मुताबिक नजरी आनावारी तियार करे के निर्देश घलोक देहे हें। हिर्री अउ रिस्दा म बिजली के अड़बड़ कटौती होए के जानकारी किसान मन दीन ते ल गंभीरता ले लेत बिजली विभाग ल दू दिन म स्थित सुधारे के निर्देश देहे हें। डॉ. अलंग ह पाराघाट म आयोजित राजस्व शिविर के घलोक अवलोकन करिन। उमन राजस्व संबंधी कई ठन काम बर आये हितग्राही मन ले चर्चा करके उंखर हाल-चाल पूछिन।
ये बेरा म सिंचाई विभाग के एसई पी.के.आनंद, एसडीएम पंकज डाहिरे, कृषि विभाग के उप संचालक पी.डी.हथेश्वर संग आन विभागीय अधिकारी घलोक संग रहिन।
