जल जीवन मिशन के संचालक डॉ. सर्वेश्वर नरेन्द्र भुरे ह करिन काम मन के जांच

कांकेर, जल जीवन मिशन के संचालक डॉ. सर्वेश्वर नरेन्द्र भुरे ह कांकेर अऊ कोंडागांव जिला म मिशन के काम मन के निरीक्षण करिन। उमन कांकेर जिला के चारामा विकासखंड के ग्राम रतेडीह, कुरुटोला, कानापोड़ अउ डेढ़कोहका म विभागीय अधिकारी मन के संग काम मन के जांच करिन अऊ जरूरी निर्देश दीन। डॉ. भुरे ह कोंडागांव जिला के केशकाल विकासखंड के गुलबापारा म घलोक मिशन के अंतर्गत होवत काम मन के अवलोकन करिन।
जल जीवन मिशन के संचालक डॉ. भुरे ह ए गांव मन म मिशन के तहत बनाय गए उच्‍च स्तरीय जलागार, सोलर आधारित योजना, नल कनेक्शन, पाइपलाइन अउ आन तकनीकी पहलु मन के जांच करिन। उमन गांव वाले मन ले गोठ बात करके नल के माध्यम ले जल आपूर्ति के जानकारी लीन। डॉ. भुरे ह विभागीय अधिकारी मन ल जल जीवन मिशन के बांचे काम मन ल लउहे पूरा करे के हुकुम दीन। मिशन के काम मन के निरीक्षण के समय ऊंखर संग लोक स्वास्थय यांत्रिकी विभाग के कोंडागांव मंडल के अधीक्षण अभियंता श्री जी.एल. लखेरा, कांकेर के कार्यपालन अभियंता श्री बी.एन. भोयर, कोंडागांव के कार्यपालन अभियंता श्री विरेन्द्र पाण्डेय, सहायक अभियंता श्री राजेश हिरकने, उप अभियंता श्री आर.पी. जोशी अऊ कु. निभा कोर्राम संग सरपंच अउ स्थानीय ग्रामीण घलोक मौजूद रहिन।