छत्तीसगढ़ राज्य के स्वप्नदृष्टा अऊ बनइया भारत रत्न श्रद्धेय अटल बिहारी वाजपेयी स्मृति संगोष्ठी

रायपुर, मुख्यमंत्री श्री विष्णु देव साय पायनियर समूह के स्थापना दिवस अऊ छत्तीसगढ़ राज्य के स्वप्नदृष्टा अऊ बनइया भारत रत्न श्रद्धेय अटल बिहारी वाजपेयी के सुरता म आयोजित संगोष्ठी समारोह म सामिल होइन। कार्यक्रम के आयोजन राजधानी स्थित श्री बालाजी मेडिकल कॉलेज के ऑडिटोरियम म संपन्न होइस। कार्यक्रम के अध्यक्षता विधानसभा अध्यक्ष डॉ. रमन सिंह ह करिन।
मुख्यमंत्री श्री विष्णु देव साय ह कार्यक्रम ल संबोधित करत कहिन के छत्तीसगढ़ वासी मन बर नवा राज्य के रूप म छत्तीसगढ़ के निर्माण भारत रत्न श्रद्धेय अटल बिहारी वाजपेयी जी के देन ये। हम ऊंखर सपना के मुताबिक छत्तीसगढ़ के चहुंमुखी विकास के रस्ता म आगू बढ़त हन।
मुख्यमंत्री श्री साय ह कहिन के भारत गांव के देश ये अऊ गांव-गांव म सड़क के जाल बिछाए म भारत रत्न श्रद्धेय अटल बिहारी वाजपेयी जी के महत्वपूर्ण योगदान हे। गांव तक आज विकास के जेन धार पहुंचे हे, वो अटल जी के ही आशीर्वाद हे। ऊंखर शासनकाल म ही देश म स्वर्णिम चतुर्भुज योजना लागू होइस अऊ टेलीकॉम इंडस्ट्री म घलोक महत्वपूर्ण काम होइस। श्री अटल जी ह ही देश म अनुसूचित जनजाति के अलग से विभाग गठित कर आदिवासी क्षेत्र मन के विकास के मार्ग प्रशस्त करिस।
कार्यक्रम म पायनियर समूह के 10 साल पूरा होए म मुख्यमंत्री ह समूह ल बधाई अऊ शुभकामना दीन। उमन कहिन के आज जेन निर्भीकता अऊ निष्पक्षता के संग पायनियर समूह ह छत्तीसगढ़ म 10 साल पूरा करे हे, वो बहुत सराहनीय हे। आगू घलोक अइसनहे निर्भीकता अऊ निष्पक्षता ले बढ़त ये समूह आम जनता के अवाज बनय। एखर संगेच उमन बालाजी ग्रुप कोति ले महिला मन के नि:शुल्क डिलीवरी अऊ उपचार करे के काम के सराहना करत बधाई दीन।