नवाचार खेती ले बनिस सफल कृषि उद्यमी, आस-पड़ोस के गांव वाले मन बर प्रेरणा
सारंगढ़-बिलाईगढ़, जिला के विकासखंड बरमकेला के अंतर्गत ग्राम नवापाली के प्रगतिशील किसान श्री मुकेश चौधरी ह नवाचार अउ आधुनिक कृषि तकनीक ल अपना के खेती के पारंपरिक सोच ल नवां रद्दा देखाए हे। ड्रिप पद्धति ले धान अउ मिर्ची के खेती करके ओ ह हर बछर लाखों रूपिया के आमदनी कमावत हे अउ आज एक सफल कृषि उद्यमी के रूप म अपन पहिचान बना चुके हे।
श्री चौधरी ह बताइस के साल 2011 म ओ ह दू एकड़ जमीन म पारंपरिक तरीका ले मिर्ची के खेती शुरू करे रिहिस। उही बेरा म उद्यान रोपणी केंद्र नदीगांव के तत्कालीन वरिष्ठ उद्यान अधीक्षक श्री सुरेन्द्र पटेल ले उनला मार्गदर्शन मिलिस, जेकर ले उनला ड्रिप पद्धति ले खेती करे के जानकारी होइस। एकर बाद साल 2013 म बरमकेला ब्लॉक म पहिली पइत ओ ह ड्रिप तकनीक ले खेती के शुरुआत करिस।
ड्रिप पद्धति के अंतर्गत खेत के गहिर जोताई करके मेड़ (Bed) बनाना, लेटरल पाइप बिछाना अउ मल्चिंग के उपयोग करत हुए मिर्ची के रोपाई करे गीस। ड्रिप के माध्यम ले सही मात्रा म सिंचाई, खाद अउ दवाई दे ले पैदावारी म भारी बढ़ोतरी होइस अउ मिर्ची के उपज लगभग दुगुना हो गे। बढ़िया परिणाम मिले ले श्री चौधरी ह धान के खेती के रकबा ल कम करके मिर्ची के खेती ल बढ़ाइस अउ अभी वर्तमान म लगभग 12 एकड़ जमीन म मिर्ची के खेती करत हे। एकर ले वोला सालाना लाखों रूपिया के आय होवत हे।
बाकी किसान मन बर बनिस प्रेरणा के स्रोत
किसान मुकेश चौधरी के सफलता ल देख के क्षेत्र के खिंचरी, बांजीपाली, बेंद्रापारा, रिसोरा, नूनपानी, लिंजिर अउ प्रधानपुर सहित आस-पास के गांव के कतको किसान घलो अब धान के संग मिर्ची अउ साग-भाजी के खेती ड्रिप पद्धति ले करे लगे हें।
‘डॉ. खूबचंद बघेल कृषक रत्न पुरस्कार’ ले मिले हे सम्मान
खेती-किसानी म नवाचार, जैविक अउ समन्वित खेती ल अपनाय खातिर साल 2021 म राज्य सरकार कोति ले श्री मुकेश चौधरी ल ‘डॉ. खूबचंद बघेल कृषक रत्न पुरस्कार’ ले सम्मानित करे गीस। ओ धान के खेती म जैविक खाद के संग-संग दलहन–तिलहन फसल म उड़द, मूंग अउ मिर्ची के खेती करिन। पुरस्कार के रूप म उनला प्रशस्ति पत्र, मोमेंटो अउ दू लाख रूपिया के चेक देहे गीस। ए सम्मान ले उनकर उत्साह बाढ़िस अउ कृषि काम म अउ विस्तार होइस।
प्राकृतिक खेती ल बढ़ावा, बीआरसी के रूप म मिलिस जिम्मेदारी
ए बछर कृषि विभाग कोति ले श्री मुकेश चौधरी ल प्राकृतिक खेती बर बीआरसी (BRC) नियुक्त करे गे हे। उनकर संग टिकेश्वरी महापात्र (जलाकोना) अउ खेल कुमारी (धौंरादरहा) ल घलो बीआरसी बनाए गे हे। विभाग कोति ले रायपुर अउ बरगढ़ (ओडिशा) म प्रशिक्षण देवा के अब ए तीनो बीआरसी- जलाकोना, धौंरादरहा, करपी, जामदलखा सहित दर्जन भर गांव के किसान मन ल प्राकृतिक संसाधन ले खाद बनाना अउ बीज उपचार के जानकारी देवात हें।
कृषि विभाग के अधिकारी मन बताइन के किसान मुकेश चौधरी ह मिर्ची के खेती के संग सरलग प्राकृतिक खेती करत हें अउ उनला राज्य सरकार ले सम्मान घलो मिल चुके हे। उनकर ए पहल क्षेत्र के किसान मन बर प्रेरणादायक साबित होवत हे।
