ड्रिप सिंचाई अउ मल्चिंग ले महिला किसान के खेती म बाढ़िस कमई

CHHATTISGARHI NEWS: कोरबा जिला के पतरापाली गांव के महिला किसान श्रीमती राजश्री मार्को आधुनिक खेती तकनीक अपनाके पताल (टमाटर) उत्पादन म उल्लेखनीय सफलता हासिल करे हवंय। राष्ट्रीय बागवानी मिशन के माध्यम ले तकनीकी मार्गदर्शन पा के वो ह 2024-25 म 1.20 हेक्टेयर जमीन म हाइब्रिड टमाटर के खेती ड्रिप सिंचाई अउ मल्चिंग तकनीक ले शुरू करे रहिस।
ड्रिप सिंचाई ले फसल के जड़ तक जरूरत के मुताबिक पानी अउ घुलनशील खाद पहुंचिस, जेकर से पानी के बचत होइस। मल्चिंग शीट ले खेत म खरपतवार कम होइस अउ नमी जादा समें तक बने रहिस। ए तकनीक ले मेहनत अउ खेती के लागत कम होइस, संगेच फसल के बढ़वार घलो सुग्‍घर होइस।
राजश्री मार्को एक सीजन म करीब 100 ले 120 टन उच्च गुणवत्ता के टमाटर के उत्पादन हासिल करिस। टमाटर बेचे ले वो ला करीब 8 ले 10 लाख रुपिया के शुद्ध लाभ मिलिस। ए सफलता ले वोकर आत्मविश्वास बाढ़े हे अउ अब वो खुद आधुनिक उद्यानिकी तकनीक अपनावत हे, संगेच आसपास के किसान मन ला घलो ए तकनीक अपनाय बर प्रेरित करत हे।
राजश्री के सफलता ले प्रभावित होके क्षेत्र के कई किसान अब ड्रिप सिंचाई, मल्चिंग अउ उन्नत उद्यानिकी फसल कोति आगू बढ़त हवंय। उद्यानिकी विभाग राष्ट्रीय बागवानी मिशन के माध्यम ले किसान मन ला आधुनिक तकनीक, गुणवत्तापूर्ण पौधा सामग्री अउ जरूरी तकनीकी मार्गदर्शन उपलब्ध करावत हे।