अब लाइसेंस प्रक्रिया जादा पारदर्शी अऊ निष्पक्ष : आधुनिक तकनीक ले होही ड्राईविंग टेस्ट : परिवहन मंत्री श्री केदार कश्यप

रायपुर, छत्तीसगढ़ राज्य म परिवहन विभाग कोति ले वाहन चालक मन के योग्यता अऊ सड़क सुरक्षा ल बेहतर बनाए खातिर ड्राइविंग टेस्ट अऊ लाइसेंसिंग प्रक्रिया के आधुनिकीकरण करे जात हे। परिवहन मंत्री श्री केदार कश्यप के हुकुम के मुताबिक राज्य के 8 जिला रायपुर, दुर्ग, बिलासपुर, जांजगीर-चांपा, जगदलपुर, अंबिकापुर, रायगढ़ अऊ कोरबा म ई-ड्राइविंग टेस्ट ट्रैक (ई-ट्रैक) के स्थापना करे जात हे।
ए आधुनिक ई-ट्रैक मन के माध्यम ले ड्राइविंग टेस्ट पूरा डिजिटल अऊ पारदर्शी तरीका ले होही। एकर उद्देश्य हे के ड्राइविंग परीक्षण म मानव हस्तक्षेप कम होवय, निष्पक्षता बने रहय अऊ सड़क दुर्घटना मनम कमी आवय। ई-ट्रैक प्रणाली म वाहन नियंत्रण, लेन अनुशासन, सिग्नलिंग, गति नियंत्रण अऊ सड़क सुरक्षा ले जुड़े तकनीक मन के उपयोग करे जाही। ये मां लगे डिजिटल सेंसर अऊ कैमरा मन अभ्यर्थी मन के ड्राइविंग क्षमता के सटीक मूल्यांकन करही। एखर से लाइसेंस प्रक्रिया पारदर्शी अऊ निष्पक्ष होही अऊ पात्र आवेदक मन ल समय म सही परिणाम प्राप्त होही।
परिवहन मंत्री श्री केदार कश्यप ह कहिन के ये पहल सड़क सुरक्षा ल बढ़ाही संगेच छत्तीसगढ़ ल स्मार्ट परिवहन व्यवस्था के दिशा म आगू ले जाही। सुरक्षित अऊ आधुनिक परिवहन व्यवस्था राज्य के मनखे मन के जीवन म सहजता अऊ भरोसा लाही। उमन कहिन के ये राज्य म सुरक्षित, स्मार्ट अऊ विश्वसनीय परिवहन व्यवस्था के निर्माण के दिशा म एक बड़का कदम हे।
परिवहन सचिव श्री एस प्रकाश ह कहिन के ई-ट्रैक के मदद ले चालक मन ल प्रमाणित करे जाही, जेखर से जिम्मेदार ड्राइविंग ल बढ़ावा मिलही अऊ सड़क दुर्घटना मन म कमी आही। उमन बताइन के ए जिला मन म ई-ट्रैक शुरू होए के बाद आवेदक ऑनलाइन आवेदन अऊ अपॉइंटमेंट बुकिंग के माध्यम ले ड्राइविंग टेस्ट दे सकही। सफल परीक्षण के बाद ओ मन ल डिजिटल फीडबैक अऊ लाइसेंस जारी करे जाही।