रायपुर/ छत्तीसगढ़ के युवा धावक अनिमेष कुजूर ह ग्रीस के एथेंस म आयोजित ड्रोमिया इंटरनेशनल स्प्रिंट मीट म 100 मीटर दौड़ ल मात्र 10.18 सेकेंड म पूरा करके भारत बर नवा राष्ट्रीय रिकॉर्ड कायम करे हे। उंखर ए ऐतिहासिक उपलब्धि म मुख्यमंत्री श्री विष्णुदेव साय ह सोशल मीडिया हैंडल ‘एक्स’ म पोस्ट करके ओ ल बधाई देहे हें।
मुख्यमंत्री श्री साय ह कहे हें के हम सबो बर ये बड़ गरब अऊ खुशी के बेरा हे के छत्तीसगढ़ के अनिमेष कुजूर ह ग्रीस म आयोजित ड्रोमिया इंटरनेशनल स्प्रिंट मीट म 100 मीटर दौड़ ल मात्र 10.18 सेकेंड म पूरा करके नवा राष्ट्रीय रिकॉर्ड कायम करे हे। एखर ले पहिली अनिमेष ह दक्षिण कोरिया म होए एशियन एथलेटिक्स चैंपियनशिप म 200 मीटर दौड़ ल 20.32 सेकेंड म पूरा करके एक अऊ राष्ट्रीय रिकॉर्ड अपन नाम करे रहिस। मुख्यमंत्री जी ह युवा खिलाड़ी अनिमेष ल बधाई देवत कहिन के आप के ये ऐतिहासिक उपलब्धि हर युवा ल आगू बढ़े के प्रेरणा देही। छत्तीसगढ़ ल आप के उपर गरब हे।
मुख्यमंत्री ह कहिन के अनिमेष के ये उपलब्धि युवा शक्ति के आत्मविश्वास अऊ सपना के उड़ान के चिनहारी ये। ओखर ये प्रदर्शन न सिरिफ छत्तीसगढ़ बल्कि पूरा देश बर गौरव के बात हे। प्रदेश सरकार युवा मन के प्रतिभा ल चिन्हें अऊ प्रोत्साहित करे बर बाना उंचाए हे।
छत्तीसगढ़ के लाल अनिमेष कुजूर ह रचिस नवा इतिहास, मुख्यमंत्री श्री विष्णुदेव साय ह दीस बधाई
