किसान मन के मदद के संग आजीविका के घलोक साधन बनिस ड्रोन
कृषि ल आधुनिक बनाए के बहुत बड़ माध्यम बनत हे ड्रोन दीदी योजना
बालोद, 12 मार्च 2024। बालोद निवासी श्रीमती चित्ररेखा साहू देश म महिला मन ल सशक्त बनाए अऊ आत्मनिर्भर बनाए बर सरकार सरलग उदीम करत हे। जेखर तहत सरकार अइसन कई योजना लॉन्च करत हे, जेखर से महिला मन आत्मनिर्भर बन सकंय अऊ अपन पहिचान बना सकंय। नमो ड्रोन दीदी योजना केंद्र सरकार ले संचालित अइसनहे एक अनूठा योजना हे। जेखर तहत महिला मन ल सशक्त बनाए के पहल करे गए हे। योजना के लाभ उठाके प्रदेश के महिला मन सफलता कोति बढ़त हे।
आज सरयू प्रसाद अग्रवाल स्टेडियम बालोद म मुख्यमंत्री श्री विष्णुदेव साय ह बालोद निवासी श्रीमती चित्ररेखा साहू ल ड्रोन के चाबी सौंपीन। ड्रोन दीदी बनके अब चित्ररेखा आधुनिक कृषि म अपन योगदान देंहीं। एखर जरिए वो कमाई घलोक कर सकही जेखर से उंखर आत्मनिर्भरता बाढ़ही। सरकार कोति ले ड्रोन चलाय के फ्री ट्रेनिंग वोला देहे गए हे।
ड्रोन के चाबी पाके चित्ररेखा अड़बड़ खुश हे अऊ सरकार के प्रति आभार घलोक जताइस। वो ह कहिस कि प्रधानमंत्री श्री नरेंद्र मोदी के पहल ले महिला मन आधुनिक कृषि कोति आगू बढ़त हें। संगेच ओ मन ल अपन गांव घर के आसपास आजीविका के घलोक साधन मिलत हे। ड्रोन दीदी योजना किसान मन के सहूलियत बर बहुत बड़ माध्यम बनत हे। ड्रोन के माध्यम ले दवई छिंचइ के सुविधा मिले ले फसल उत्पादन लागत म कमी आवत हे। संगेच निरधारित क्षेत्र म एकरूपता म दवाई के छिड़काव होवत हे। एखर से फसल के उत्पादन बाढ़त हे अऊ किसान मन ल जादा आर्थिक लाभ होवत हे।
श्रीमती चित्ररेखा ह बताइस कि ड्रोन दीदी योजना ले कृषि म अवइया समस्या मन घलोक कम हो गए हे। बरसात म किसान मन ल खेत के भीतर जाके दवई छिंचइ म दिक्कत होथे। कीड़ा मकोड़ा कहूं खेत के भीतर हे तो सावधानी बरतना परथे। अइसन म मेड़ म खड़े होके ड्रोन ले काम कर जा सकत हे। संगेच आसानी ले दवाई के छिड़काव करे जा सकत हे। चित्ररेखा ह बताइस कि उंखर पढ़ाई कक्षा 12 वी तक होए हे। परिवार म पति अउ तीन लइका हे। खेतीबाड़ी करके जीविकोपार्जन चलथे। सरकार के योजना ले अब ओ मन ल आजीविका के नवा साधन मिल गए हे। एखर से परिवार के भरण पोषण अऊ लइका मन के पढ़ाई लिखाई म मदद मिलही। वो ह कहिस कि मोर जइसे हजारों बहिनी आगू आवव अऊ ड्रोन दीदी बनव। बहुत अकन दीदि मन हमार संग म ड्रोन दीदी के नाम ले पहचाने जाही अऊ सरकार के योजना के लाभ उठा पाहीं।
