प्रेरणा के मिसाल बनिस ड्रोन दीदी गोदावरी साहू

राज्यपाल श्री डेका ह करिन सम्मान, दीन 10 हजार रूपिया के प्रोत्साहन राशि
मुंगेली, छत्तीसगढ़ के महिला मन के आत्मनिर्भर बने के दिशा म एक नवा पहिचान बनाए ड्रोन दीदी श्रीमती गोदावरी साहू ल आज राजभवन म राज्यपाल श्री रमेन डेका ह स्मृति चिन्ह दे के सम्मानित करिन। ए बेरा म राज्यपाल ह ओ मन ल 10 हजार रूपिया के प्रोत्साहन राशि घलोक भेंट करिन अऊ ऊंखर काम मन ल सहरावत कहिन के ओ मन ग्रामीण महिला मन बर सिरतोन के प्रेरणा हे। ए बेरा म राज्यपाल के सचिव डॉ. सी.आर. प्रसन्ना घलोक उपस्थित रहिन।
मुंगेली जिला के नगर पंचायत सरगांव के रहवइया गोदावरी साहू नमो ड्रोन दीदी के रूप म कार्यरत हे। उमन पारंपरिक खेती ले हटके आधुनिक तकनीक ल अपनाए हे अऊ ड्रोन के माध्यम ले किसान मन के खेत मन म नैनो यूरिया, डीएपी खाद अऊ कीटनाशक मन के छिड़काव करना शुरू करे हे। एखर से न केवल फसल मन के पैदावार बेहतर होए हे, बल्कि समय अऊ श्रम के घलोक बचत होए हे।
राज्यपाल ह कहिन के गोदावरी साहू के ये सफर बताथे के कहूं संकल्प अऊ नवाचार होही त ग्रामीण महिला मन घलोक आत्मनिर्भर बन सकत हें अऊ दूसर मन ल घलोक आगू बढ़े के प्रेरणा दे सकत हें। गोदावरी न सिरिफ अपन जीवन ल संवारत हे, बल्कि आसपास के किसान मन के प्रगति म घलोक भागीदार बन गे हे।