स्व-रोजगार ले जोड़े खातिर स्व-सहायता समूह के महिला मन ल देहे जाही ड्रोन प्रशिक्षण

रायपुर, 18 सितमबर 2024, नमो ड्रोन दीदी योजना अंतर्गत बलौदाबाजार जिला के स्व सहायता समूह के जादा ले जादा महिला मन ल ड्रोन उडाए क़े प्रशिक्षण देके स्वरोजगार ले जोड़े जाही। कलेक्टर श्री दीपक सोनी ह कृषि विभाग के अधिकारी मन ल ए सबंध म जरुरी निर्देश दीन हे। ड्रोन दीदी श्रीमती निरुपा  साहू अउ ड्रोन पायलट निखिल कन्नौजे ह कलेक्टर श्री सोनी ले मुलाकात करके अपन अनुभव साझा करिन। कलेक्टर ह ऊंखर काम लसहरावत ओ मन ल प्रेरणा स्रोत बताइन। उमन उर्वरक अउ कीटनाशक  छिड़काव म ड्रोन के उपयोग ल किसान मन बर फायदेमंद कहिन अऊ जादा ले जादा उपयोग करे के बात कहीन।
विकासखंड बलौदाबाजार अंतर्गत ग्राम लाहौद निवासी ड्रोन दीदी श्रीमती निरुपा साहू ह अपन अनुभव साझा करत बताइन के उमन ड्रोन ले दवाई छिड़काव क़े काम अपरेल 2024 ले शुरू करे हें। एखर पहिली वो ह ग्वालियर स्थित प्रशिक्षण संस्थान ले ड्रोन उडाए के 15 दिन के प्रशिक्षण लीस। वो ह बताइस के वो ह बिहान अंतर्गत वैभव लक्ष्मी स्व सहायता समूह ले जुडे हे। नमो ड्रोन दीदी योजना के बारे म जानकारी कृषि विभाग के अधिकारियो ले मिलीस। ड्रोन दीदी ह बताइस के ड्रोन ले यूरिया या कीटनाशक छिड़काव बर प्रति एकड 300 रुपिया शुल्क लेथे अऊ ओ ल अब तक करीब 25 हजार रूपिया के कमइ हो गे हे। ग्राम  लटुआ निवासी ड्रोन पायलट निखिल कन्नौजे ह बताइस के वो इफ्को कंपनी ले जुडे हे अऊ कंपनी के माध्यम ले ड्रोन चलाय के प्रशिक्षण लेहे हे। वो ह बताइस के ड्रोन ल 2 ले 3 किलोमीटर के दूरी तक उड़ाए जा सकत हे। वो ह पाछू अपरेल महिना ले करीब 88 एकड़ खेत मन म दवाई के छिड़काव ड्रोन ले करे हे।
जानबा हे कि केंद्र सरकार कोति ले नमो ड्रोन दीदी योजना के शुरुआत करे गए हे। ए योजना के मुख्य उद्देश्य हे कि अवइया चार बछर म 15 हजार स्‍व सहायता समूह मन ल ड्रोन उपलब्‍ध कराए जाय। ये ड्रोन, महिला स्‍व सहायता समूह मन बर उपलब्‍ध कराए जाही। ए ड्रोन्स के उपयोग कृषि क्षेत्र म उर्वरक के छिड़काव करे बर करे जाही।